राजधानी दैनिक
साउन २२, काठमाडौं ।चाबहिलआसपासको सडक विस्तार तथा मर्मतका नाममा सडक भत्काएर लथालिंग छाडेपछि स्थानीय फेरि आन्दोलनमा उत्रिएका छन् । जनप्रतिनिधिको बेवास्ता र ठेकेदारको लापरबाहीका कारण आजित बनेका सर्वसाधारण पटक–पटक सडक आन्दोलन गर्न बाध्य बनेका हुन् । निर्माण थालिएको लामो समयसम्म पनि चाबहिल–चुच्चेपाटी खडकखण्डमा कालोपत्रे नभएपछि स्थानीय मंगलबार सडकमा उत्रिए । स्थानीयलगायत व्यवसायीले सडकमै उत्रेर विरोध प्रदर्शन जनाएपछि यातायात अवरुद्धसमेत भए ।
बौद्धबासीले मंगलबार बिहानै सडकमा उत्रिएर ढल निर्माण र कालोपत्रे गर्नुपर्ने माग राख्दै केही घन्टा यातायात अवरुद्ध पारे । जोरपाटी चोकदेखि नारायणटार, दक्षिणढोकादेखि मुलपानी तिवारीडोल र गोकर्ण रिसोर्टदेखि परसम्म पिच गरिए पनि अन्य भागमा सडकको अवस्था लथालिंग छ । नेकपा नेता तथा प्रदेश सांसद रामेश्वर फुया“लले लामो समयसम्म कालोपत्रे नहुँदा सर्वसाधरण सडकमै आएर विरोध जनाउनु सामान्य रहेको बताए । ‘तीनै तहका सरकार विकास निर्माणलाई गति दिन लागिपहेका छन्,’ उनले भने, ‘जग्गाको मुआब्जा वितरण, ठेकेदारको लापरबाही र प्रशासनीय ढिलासुस्तीले विकास निर्माणमा ढिला भएको हो तर हामीले गति लिनेगरी पहल गरिरहेका छौं ।’
सांसद फुया“लले आफू संविधानसभा सदस्य हुँदा ३ असार २०७३ मा चाबहिल, जोरपाटी, सुन्दरीजललगायत क्षेत्रको सडकको टेन्डर गरिए पनि मुआब्जा विवादले समस्या देखिएको बताए । अन्य सडकखण्डमा प्रगति देखिए पनि जोरपाटी–सुन्दरीजल खण्डमा भने १०/१५ प्रतिशत मात्र प्रगति भएको भन्दै उनले जग्गा विवाद र क्षतिपूर्तिकै कारण ढिला भएको दावी गरे । यात, मंगलबार नै चाबहिल–चुच्चेपाटी क्षेत्रका बासिन्दा पनि आन्दोलनमा उत्रिए । यस क्षेत्रमा सडकभर खाल्डाखुल्डी र अव्यवस्थित ढलले यात्रा गर्न कठिन अवस्था सिर्जना भएको छ ।
