क्षमा मागेर नेकपाले सरकारी जग्गामा रहेको पार्टी कार्यालय छाडोस्

साउन २३,
काठमाडौं । प्रमुख प्रतिपक्षी दल नेपाली कांग्रेसले सत्तारुढ दल नेपाल कम्युनिस्ट पार्टी(नेकपा) को राजनीतिक प्रतिवेदनमा कांग्रेस प्रतिको धारणामा आपत्ति जनाएको छ । नेकपाले प्रतिवेदनमा इमान्दार दृष्टि नराखि दृष्टिदोष प्रस्तुत गरेको कांग्रेसको भनाइ छ । बिहीवार पार्टी कार्यालय सानेपामा पत्रकार सम्मेलन गर्दै कांग्रेस प्रवक्ता विश्वप्रकाश शर्माले नेकपाको दृष्टिदोषमाथि दया मात्र रहने भन्दै भने,‘म विनम्र ढंगले दया व्यक्त गर्न चाहन्छु ।’

पत्रकार सम्मेलनमा प्रवक्ता शर्माले सरकारी जग्गामा रहेको पार्टी कार्यालय नेकपाले तत्काल छोड्नु पर्ने बताए । नेकपाको केन्द्रीय कार्यालय नियम र नैतिकता विपरित सरकारी जग्गामा रहेको भन्दै शर्माले यसले कांग्रेसलाई अचम्मित र दु:खी बनाएको प्रतिक्रिया दिए ।

‘नेकपाको कार्यालय नियम र नैतिकताविपरित सरकारी जग्गामा रहेको विषयले कांग्रेसलाई अचम्मित र दु:खी बनाएको छ’ प्रवक्ता शर्माले भने हामी आशा गर्छौं, यस्तो गम्भीर गल्तीप्रति क्षमायाचना गर्दै नेकपाले तत्काल सरकारी जग्गाबाट बाहिरिएर नीति नियम र नैतिकतालाई थप लज्जित हुनबाट जोगाउने छ ।’ केही दिन अघि एक दैनिक पत्रिकामा नेकपाको केन्द्रीय कार्यालय सरकारी जग्गामा रहेको समाचार सार्वजनिक भएपनि कांग्रेसले त्यसबारे आफ्नो धारणा सार्वजनिक गरेको हो ।

त्यस्तै प्रवक्ता शर्माले शर्माले ‘निजामति सेवाको गठन, सञ्चालन र संवादका शर्त’ सम्बन्धी विधेयकको दफा १२० को उपदफा ६ मा आधिकारिक ट्रेड यूनियन बाहेक अन्य कुनै पनि यूनियन वा निजामति कर्मचारीको समूहले आफ्ना हकहितका लागि मागसमेत प्रस्तुत गर्न नपाउने व्यवस्था संविधानले प्रत्याभूत गरेको अधिकारविपरीत रहेको तर्क गरे ।