एजेन्सी, चैत १७,
काठमाडौ -इन्डियन प्रिमियर लिग (आईपीएल) को शनिबार राति भएको खेलमा सन्दीप लामिछानेको टोली दिल्ली क्यापिटलले जित हात पारेको छ । निर्धारित २० ओभरमा रन बराबरी भएपछि सुपर ओभरमा गएको खेलमा दिल्लीले बाजी मार्न सफल भयो ।
फेरोज शाह कोटला मैदान दिल्लीमा भएको खेलमा दिल्लीले टस जितेर पहिले बलिङ रोजपछि ब्याटिङमा उत्रिएको कोलकात्ताले २० ओभरमा ८ विकेट गुमाएर १८५ रन बनाएको थियो । १८६ रन को लक्ष्य पाएको दिल्लीले २० ओभरमा ६ विकेट गुमाइ १८५ नै रन बनाएपछि खेल सुपर ओभरमा धकेलिएको थियो ।
लक्ष्य पछ्याउने क्रममा दिल्लीका लागि ओपनर ब्याट्सम्यान पृथ्वी शाले ५५ बलमा ९९ रन बनाइ दिल्लीलाई जितको नजिक पुर्याएका थिए । १९ औं ओभरमा शा आउट भएपछि दिल्लीको इनिङ धरमरायो । अन्तिम ओभरमा जितका लागि ६ रन चाहिएकोमा कोलकात्ताका बलर कुलदीप यादवले एक विकेट लिँदै ५ रनभन्दा बढी जोड्ने अवसर दिएनन् र खेल बराबरी भयो ।
सुपर ओभरमा पहिले क्याटिङ गरेका दिल्लीका ब्याट्सम्यानले १ विकेट गुमाइ १० रन जोडेका थिए । कोलकात्तालाई ११ रन बनाई जित दिलाउँनका लागि क्रिजमा खडा भएका थिए अघिल्लो इनिङमा ६ छक्का र ४ चौकासहित २८ बलमा ६२ रन बनाएका वेस्टइन्डिजका अलराउन्डर आन्द्रे रसेल र साथमा कप्तान दिनेश कार्तिक । उनलाई रोक्न बलिङमा दिल्लीले दक्षिण अफ्रिकी दायाँहाते फास्ट बलर कागिसो रबडालाई पठायो । पहिलो बलमा नै चौका प्रहार गरेका रसेलले दोस्रो बल डट खेले र तेस्रो बलमा बोल्ड हुन पुगे । त्यसपछिका बलमा रबडाले कोलकात्ताका ब्याट्सम्यानलाई बाउन्ड्रिसम्म बल पुर्याउने मौका दिएनन्। सुपर ओरभमा कोलकात्ताको ७ रन मात्रै बन्यो । र दिल्लीले खेल जित्यो।
पहिलाको इनिङमा ४ ओभरमा ४१ रन दिएर सबैभन्दा महंगो बनेका रबडा सुपर ओभरमा कसिलो बलिङ गरी खेल जिताउन सफल भए। आईपीएल यस सिजनमा पहिलो पटक खेल्ने मौका पाएका नेपालका लेग स्पीनर सन्दीप लामिछाने ४ ओभरमा २९ रन दिएर १ विकेट लिए । यस खेलमा सन्दीपको बलिङ दिल्लीका लागि सबैभन्दा किफायती हो ।
