काठमाडौँ । दुई युवाको हत्या अभियोग लागेका बागलुङका १५ जना युवालाई जन्मकैदको फैसला भएको छ । घटनामा संलग्न एक बालकलाई सुधारगृह पठाइने भएको छ । २०७७ सालको चैत १५ गते होली खेल्ने क्रममा भएको झडपमा बागलुङको निसीखोला गाउँपालिका-७ का प्रकाश कुँवर र दीपक परियारको मृत्यु भएको थियो ।
कुटपिट गरेपछि भीरबाट खसाल्दा मृत्यु भएको प्रहरी अनुसन्धानमा खुलेपछि बडिगाड गाउँपालिका १० का १८ जना युवाहरू पक्राउ परेका थिए । पक्राउ परेकामध्ये १५ जनालाई जन्मकैद भएको हो । दुई जना तारेखमा छुटेका थिए ।
जिल्ला न्यायाधीश दिवाकर भट्टकोको इजलासले घटनाका दोषीलाई फौजदारी संहिताको दफा १७७ (२) अनुसार जन्मकैद फैसला भएको इजलास अधिकृत गंगाराम सापकोटाले जानकारी दिए । उनीहरूलाई २५ वर्ष कैद हुनेछ ।
२०७७ चैत १५ गते भएको घटनाका अभियुक्त अधिकांश पुर्पक्षमा थिए । पक्राउ परेका रेशम बुढामगर, रेशम भन्ने भेषराज बुढा, मिलन बुढा मगर, झनबहादुर बुढा, समबहादुर बुढा, तेजपाल भन्ने तेजेन्द्र छन्त्याल, सुमन बुढा, सूर्य बुढा, कुमार छन्त्याल, तीर्थराज बुढा, विमल बुढा, रुपेश बुढा मगर, हस्तबहादुर बुढा, राजु बुढा र अर्पण बुढालाई जन्मकैदको फैसला भएको हो ।
