अन्नपूर्ण पोष्ट
साउन २९, काठमाडौं । प्रधानमन्त्री केपी ओलीले स्वदेश फर्केलगत्तै राजनीतिक भेटघाट तीव्र पारेका छन्। उपचारका लागि १० दिन सिंगापुर बसेर सोमबार फर्कनेबित्तिकै नेकपा अध्यक्षसमेत रहेका ओली सचिवालय बैठकको तयारीमा जुटेका हुन्। यस क्रममा उनले सचिवालय सदस्यहरूसँग सामूहिक र छुट्टाछुट्टै छलफल गरेका छन्।
प्रधानमन्त्री ओलीले सोमबार उपप्रधान तथा रक्षामन्त्री ईश्वर पोखरेल र महासचिव विष्णु पौडेलसँग बालुवाटारमा भेटघाट गरेका थिए। उनले पार्टीका अर्का अध्यक्ष पुष्पकमल दाहालसँग पनि भेटवार्ता गरेका थिए। ‘प्रधानमन्त्री आफ्नो दैनिक काममा सक्रिय भइसक्नुभएको छ। उहाँले स्वदेश फर्केलगत्तै राजनीतिक भेटघाट थालिसक्नुभएको छ,’ प्रधानमन्त्रीका प्रेस सल्लाहकार डा। कुन्दन अर्यालले अन्नपूर्णसँग भने, ‘प्रधानमन्त्री फर्केलगत्तै उपप्रधानमन्त्री, पार्टी अध्यक्ष, महासचिवलगायत नेताहरूसँग भेटघाट गर्नुभएको छ। मंगलबार पनि बिहानैदेखि पार्टी नेताहरूसँग सचिवालय बैठकको गृहकार्यका लागि भेटघाट गर्नुभएको छ।’ सचिवालय बैठक बुधबार बस्दैछ। प्रधानमन्त्री ओलीले अध्यक्ष दाहाल र महासचिव पौडेलसँग सोमबार नै छलफल गरी पूर्वनिर्धारित सचिवालय बैठक एक दिनपछि सारेर आन्तरिक गृहकार्यमा छलफल थालेका थिए।
‘पार्टी नेताहरूसँग उहाँले सचिवालय बैठकको तयारीका लागि छलफल गर्नुभएको छ,’ अर्यालले भने, ‘अधिकांश सचिवालयका सदस्यसँग प्रधानमन्त्रीले भेटेर छलफल गरिसक्नुभएको छ।’ ओलीले मंगलबार बिहान पूर्व एमालेका सचिवालय सदस्यहरू माधव नेपाल, झलनाथ खनाल, वामदेव गौतम, विष्णु पौडेल र ईश्वर पोखरेलसँग सामूहिक भेट गरे। दिउँसो अध्यक्ष दाहाल, रामबहादुर थापासँग महासचिव पौडेलसहित राखेर छलफल गरे। साँझ फेरि उनले संसदीय दलका उपनेता सुवास नेम्बाङ, परराष्ट्रमन्त्री प्रदीप ज्ञवालीलगायत पूर्वएमालेका नेताहरूसँग छलफल गरे। सरकारका मन्त्रीसमेत रहेका नेताहरूसँग सरकारको कामका विषयमा पनि उनले बिफ्रिङ लिएका छन्। यस्तै अन्य नेताहरुसँग भने पार्टीको कार्यविभाजन प्रस्तावका विषयमा छलफल गरेका छन्।
पार्टीका ३२ केन्द्रीय विभाग, एउटा नीति अध्ययन प्रतिष्ठान, उपत्यका विशेष प्रदेश, सम्पर्क कमिटी, प्रवास कमिटी र २२ वटा जनवर्गीय संगठनका फ्याक्सन इन्चार्जको जिम्मेवारीलगायतमा पार्टी नेताहरूको कार्य विभाजन बाँकी छ। ‘५ साउनमा जिल्ला इन्चार्ज÷सहइन्चार्जको टुंगो लगाएपछि विभागको जिम्मेवारी चयनको कार्यसूचीमा नेकपा सचिवालय बैठक प्रवेश गरेको हो। तर पार्टीको स्कुल विभागको नेतृत्वका लागि पार्टी सचिवालयका सदस्यहरू नारायणकाजी श्रेष्ठ र ईश्वर पोखरेल दुवैले दाबी नछोडेपछि नेतृत्वले विभागीय जिम्मेवारी टुंग्याउन सकेको छैन। १३ साउनको बैठकले महासचिव पौडेललाई कार्यविभाजन बाँकी रहेका नेताहरूसँग प्राथमिक सूचीका आधारमा रुचि बुझेर व्यवस्थित गर्न जिम्मेवारी दिएको थियो। त्यसपछि दुवै अध्यक्ष विदेश गएका थिए। दाहाल दुबई र ओली सिंगापुरबाट फर्केपछि महासचिव पौडेलले नेताहरूसँग छलफलका आधारमा तयार पारेको प्रस्ताव दुवै नेतालाई बुझाएका छन्।
