काठमाडौं : आईसीसी विश्वकप क्रिकेट छनोटमा पूर्वविश्वबिजेता वेष्टइण्डिजले नेपाललाई ३ सय ४० रनको चुनौती दिएको छ। जिम्बावेको हरारे स्पोर्टस् क्लबमा टस हारेर पहिला ब्याटिङमा तानिएको वेष्टइण्डिजले निर्धारित ५० ओभरमा ७ विकेट गुमाउँदै ३ सय ३९ रन बनाएको हो। वेष्टइण्डिजका लागि कप्तान साइ होप र निकोलस पुरनले शतकीय पाली खेले। साइ होपले १ सय ३२ र पुरनले १ सय १५ रनको महत्वपूर्ण योगदान गरे। ब्रान्डन किङ ३२, रोभमन पवेलले २९, किमो पल र केल मेयर्स एक रनमा आउट हुँदा जोन्सन चार्ल्स बिना रन पेभिलियन फर्किए । ज्यासन होल्डर १६ रनमा नटआउट रहे। नेपालका ललित राजवंशीले ३, सन्दीप लामिछाने, करण केसी, गुल्सन झा र दीपेन्द्रसिंह ऐरीले एक/एक विकेट लिएका छन्। नेपालले केहीबेरमा जवाफी ब्याटिङ गर्नेछ। नेपालले वेष्टइण्डिजसँग अहिलेसम्म कुनै पनि फर्म्याटको खेल खेलेको छैन । त्यसैले यो पहिलो भेटलाई जितका साथ ऐतिहासिक बनाउने नेपालको लक्ष्य छ ।
