माघ २४,
विराटनगर । मंगलबारबाट सम्पर्कविहीन भएकी महिलाको शव हत्या गरी फालिएको अवस्थामा फेला परेको छ । सुनसरीको दुहबी नगरपालिका– ६ काली मन्दिर नजिकै घर भएकी ३२ वर्षीया सम्झना खत्री परियारको शव शुक्रबार बिहान विराटनगर– १२ रिङरोड नजिकै रहेको उखुबारीमा फेला परेको हो । दुई सन्तानकी आमा सम्झना बेपत्ता भएपछि आफन्तले बिहीबार प्रहरी चौकी निमुवामा निवेदन दिएका थिए । शुक्रबार बिहान विराटनगर– १२ बखरीको मलहनवास्थित उखुबारीमा घाँटी रेटेर सलले बेरेको अवस्थामा परियारको शव फेला परेको जिल्ला प्रहरी कार्यालय मोरङका प्रहरी उपरीक्षक विश्व अधिकारीले जानकारी दिए ।
‘घटना स्थलमा हत्या भएका देखिँदैन्,’ उनले भने, ‘ अन्तै हत्या गरी महिलाको शव उखुबारीमा ल्याएर फालेको जस्तो देखिन्छ ।’ निलो आउटर, हरियो कुर्ता लगाएकी महिलाले अनुहारमा मेकअप र आँखामा गाजल लगाएको अवस्थामा शव फेला परेको प्रहरीले बताएको छ । घाँटी रेटेर सलले बरेको अवस्थामा शव भेटिएको र शव नजिकै सुरुवाल पनि भेटिएको प्रहरी उपरीक्षक अधिकारीले बताए । उनका अनुसार महिलाको अन्तै हत्या गरी राति मोटरसाइकलमा राखेर उखुबारीसम्म शव ल्याएको हुनसक्छ ।
मंगलबारदेखि बेपत्ता भएकी महिला दुई दिनसम्म कहाँ थिइन भन्ने खुलेको छैन् । प्रहरीले सूक्ष्म अनुसन्धान सुरु गरेको बताउँदै प्रहरी उपरीक्षक अधिकारी केही दिन भित्र हत्यामा संलग्नहरु पक्राउ पर्ने बताउँछन् । मृतकमा श्रीमान बसन्त परियार इलाममा टेलरिङको काम गर्दै आएका छन् । दुई हप्ता अघि घर आएर उनी इलाम फर्कीएका थिए । सम्झना छोरीसँग बस्दै आएकी थिइन् । सम्झनाका छोरी कक्षा ७ र कक्षा १० मा अध्ययनरत छन् । श्रीमान बसन्तका अनुसार मंगलबार दिउँसो टेलिफोन सम्पर्कमा सम्झनाले टाउको दुखेकाले आराम गरी बसेको बताएकी थिइन् । तर बेलुका छोरीले आमा घरमा नरहेको जानकारी गराएपछि बसन्त बुधबार घर फर्केका थिए ।
उनीसँग सम्झनाकी आमा पनि घर आएकी थिइन् । सोधी खोजी गर्दा नभेटेपछि बिहीबार प्रहरी चौकी निमुवामा श्रीमती हराएको सूचना पनि दिएका थिए । घटना संकास्पद रहेकाले अनुसन्धानका लागि तालिमप्राप्त कुकुरको प्रयोग गरिएको बताउँदै प्रहरी उपरीक्षक अधिकारीले शवको पोष्टमार्टमका लागि कोशी अञ्चल अस्पताल पठाएको जानकारी दिए । -onlinekhabar
