चैत १९, एजेन्सी,
प्योङयाङ– रुसका गृहमन्त्रीको नेतृत्वमा वरिष्ठ अधिकारीहरु सम्मिलित एक प्रतिनिधिमण्डलले उत्तर कोरियाको भ्रमण गरेको छ । कोरियाली केन्द्रीय समाचार समिति (केसिएनए) ले रुसी गृहमन्त्री भ्लादिमिर कोलोकोल्सेभको नेतृत्वमा रुसको उच्च पदाधिकारीको एक टोली सोमबार प्योङयाङ भ्रमणमा आएको जनाएको छ ।
उत्तर कोरियाली नेता किम जोङ–उनले यसै महिनाभित्र रुसी राष्ट्रपति भ्लादिमिर पुटिनको निमन्त्रणमा रुसको भ्रमण गर्ने सम्भावना छ । उक्त भ्रमणको तयारीका लागि पनि रुसी गृहमन्त्रीको भ्रमण भएको अडकलबाजी गरिएको छ ।
केहीअघि मात्र कार्यवाहक सेनाप्रमुख किम चाङ–सोनले मस्को र भ्लाडिभोस्टकको भ्रमण गरेका थिए । उत्तर कोरियाली नेता किमले अमेरिकी राष्ट्रपति डोनाल्ड ट्रम्पसँग शिखर बैठक गर्नुअघि चार पटक चीनको भ्रमण गरिसकेका छन् । तर किमले सन् २०११ मा सत्ता सम्हालेयता रुसको भ्रमण गरेका थिएनन् ।
हाल, उत्तर कोरियाले रुससँगको सम्बन्ध सुदृढ तुल्याउन कुटनीतिक पहललाई तीव्र बनाएको छ । खासगरी अमेरिकी राष्ट्रपतिसँगको हनोई वार्तामा सोचेजति प्रगति नभएपछि उत्तर कोरियाले कुटनीतिक पहललाई तीव्र बनाउन लागेको हो ।–एएनआई
