फागुन २७,
भक्तपुर। जेहेन्दार तथा आर्थिक अवस्था कमजोर भएका विभिन्न बिद्यालयका १ देखि १२ कक्षासम्म अध्ययनरत नौसय विद्यार्थीलाई बिहीबार जनक खड्का छात्रवृत्ति कोषले रु १० लाख बराबरको छात्रवृत्ति प्रदान गरेको छ ।
हाल जर्मनीमा बसोबास गर्दै आएका भक्तपुरको दधिकोटस्थित अरनिको उच्च माविका पूर्वविद्यार्थी किरण खड्का र दुर्गा खड्काले आफ्नो छोरा जनक खड्काको स्मृतिमा स्थापना गरेको कोषबाट विद्यार्थीलाई नगद, स्टेसनरी, विद्यालय पोसाक र ट्र्याक सुटलगायत शैक्षिक सामग्री वितरण गरेको हो ।
कोषले अरनिको उच्च माविका चारसय, अरनिको स्रोत केन्द्र अन्तर्गतका १२ विद्यालयका एकसय ५०, श्रीगणेश भारती मावि काभ्रेका दुईसय ५०, बालसुधार मावि गोकर्णका सय, त्रिभुवन उच्च मावि गुल्मीका दुईसय, पृथ्वी उच्च मावि गुल्मीका दुईसय विद्यार्थीलाई विद्यालयमा आयोजित कार्यक्रममा छात्रवृत्ति प्रदान गरेको कोषका अध्यक्ष सानुबाबु खड्काले जानकारी दिए । कोषले अरनिको उच्च माविका एकसय २० विद्यार्थीलाई नगद छात्रवृत्ति र अन्य विद्यार्थीलाई विद्यालय पोसाक र स्टेसनरी वितरण गरेको विद्यालय व्यवस्थापन समितिका अध्यक्ष प्रेम खड्काले बताए ।
गुल्मीका दुई विद्यालयका चार छात्रालाई नगद रु सात हजारसहित पोसाक वितरण गरेको छ भने अन्य विद्यार्थीलाई विद्यालय पोसाक, ट्र्याक सुट र स्टेसनरी सामग्री वितरण गरेको कोषका अध्यक्ष खड्का जानकारी दिए ।
