काठमाडौँ । नेपाल दूरसञ्चार कम्पनी लिमिटेड २० औँ वर्षमा प्रवेश गरेको छ । आज सम्पन्न भएको १९ औँ वार्षिकोत्सवसँगै सरकारबाट प्रायोजित नेपाल टेलिकम २० औँ वर्षमा प्रवेश गरेको हो ।
कम्पनीले प्रत्येक वर्षको माघ २२ गते आफ्नो वार्षिकोत्सव मनाउने गरेको छ । २०६० साल माघ २२ गते नेपाल दूरसञ्चार कम्पनीका रूपमा भएको थियो । तर, त्यसअघि २०३२ साल असार १ गते नेपाल दूरसञ्चार संस्थानकारुपमा कम्पनीको स्थापना भएको थियो । सोही कारण, कम्पनीले दर्ता भएको दिनलाइ नै आफ्नो स्थापना दिवसकारुपमा मनाउँदै आएको छ ।
सञ्चालनमा आएको १९ वर्षको अवधि बित्दा हाल कम्पनीमा २ करोड १३ लाखभन्दा बढी ग्राहक रहेका छन् । यो यही वर्षको मंसिर मसान्तसम्मको अवधिको तथ्याङ्क हो । यस्तै, टेलिकमको पीएसटीएन सेवातर्फ ४ लाख ५५ हजार ग्राहक छन् । यस्तै, आर्थिक वर्ष २०७८/७९ मा कम्पनीको कूल राजश्व ४४ अर्ब ३७ करोड रुपैयाँ छ भने खुद नाफा ८ अर्ब ४७ करोड रुपैयाँ छ । हाल टेलिकममा फोरजी प्रयोगकर्ताको संख्या १ करोड १५ लाख ५० हजार छन् ।
टेलिकमले देशभर पीएसटीएन, सीडीएमए र जीएसएम लगायतका टेलिफोन सेवा उपलब्ध गराउँदै आइरहेको छ । यस्तै, कम्पनीले सेवाग्राहीहरूलाई इन्टरनेट सेवाको समेत सेवा दिँदै आइरहेको छ ।
