भोजपुरको घोडेटारबाट धरान आउँदै गरेको बोलेरो जिप दुर्घटना हुँदा ६ जनाको घटनास्थलमै मृत्यु भएको छ।
प्रदेश प्रहरीका एसपी दिपक पोखरेलका अनुसार उदयपुरको वेलका नगरपालिका– ७ स्थित एउटा भीरबाट गाडी खस्दा ६ जनाको घटनास्थलमै ज्यान गएको हो। बिहीबार बिहान करिब साढे १० बजेतिर भएको दुर्घटनामा थप सात जना गम्भीर घाइते छन्। सडकबाट चार वटा मोडहरू समेत कटेर जिप खोँचमा खसेका कारण उद्धार गर्न कठिनाइ भइरहेको प्रहरीले जनाएको छ। दुर्घटनास्थलमा उद्धार कार्यमा खटिएका स्थानीय मिलन सुभाराका अनुसार जिपमा सात जना जति मानिसहरू च्यापिएका छन्। केही यात्रु जिपले नै थिचिएका छन्। उद्धार गर्न कठिनाइ भइरहेका कारण मृतकको संख्या बढ्ने उनले बताए। को १ ज ३२९३ नम्बरको बोलेरो जिप दुर्घटना भएको हो। दुर्घटनाका मृतकहरूको पहिचान खुलिसकेको छैन। उदयपुरको वेलका नगरपालिका–७ स्थित उदयपुर र भोजपुर जोड्ने चुहार पुल जाने ओरालो सडकमा दुर्घटना भएको हो। दुर्घटनास्थलमा प्रहरी पुगिसके पनि उद्धार गर्न सकेको छैन।
