काठमाडौँ । प्रधानमन्त्री पुष्पकमल दाहाल ‘प्रचण्ड’ले नेपालको पूर्वाधार विस्तारमा चिनियाँ लगानीको अपेक्षा भएको बताएका छन्।
मङ्गलवार नेपाल उद्योग परिसंघ (सिएनआई) र चाइना काउन्सिल फर प्रमोसन अफ इन्टरनेसनल ट्रेडले आयोजना गरेको नेपाल चाइना बिजनेस फोरममा प्रधानमन्त्री प्रचण्डले पूर्वाधार विस्तारमा चिनियाँ सहयोग भइरहेको बताएका हुन् ।
उनले अति कम विकसित राष्ट्रबाट नेपाल स्तरोन्नति हुँदै गरेकोमा पूर्वाधार विस्तारको आवश्यकता रहेको पनि बताए।
सरकारले लगानीलाई प्रोत्साहन गरेको, लगानीमैत्री कानुनहरू रहेको र नेपालमा लगानी गर्नसमेत आग्रह गरेको प्रधानमन्त्री प्रचण्डको भनाइ छ । ऊर्जा, उत्पादनमूलक उद्योग तथा खानी क्षेत्रमा लगानी गरेर लाभ उठाउन सक्ने उनले बताए ।
प्रचण्डले चीन नेपालको लागि दोस्रो ठुलो व्यापार साझेदार र प्रत्यक्ष वैदेशिक लगानी प्रतिवद्धतामा पहिलो राष्ट्र रहेको पनि बताए । नेपाल र चीनको आर्थिक सम्बन्ध थप मजबुत बनाउनु पर्नेमा उनले जोड दिए । उनले नेपाल र चीनबीचको व्यापारमा असन्तुलन बढेकोमा चिन्ता व्यक्त गरे।
नेपालमा लगानी विस्तार गर्न चिनियाँ लगानीकर्तालाई प्रचण्डले आग्रह गरेका छन् । व्यवसाय र लगानीमैत्री वातावरण भएको र नेपालको करको दर अन्य मुलुकको तुलनामा कम भएको प्रधानमन्त्री प्रचण्डले दाबी समेत गरेका छन् । उनले भने, ‘व्यवसायमा लाभांशको दर राम्रो छ ।’
नेपालले विदेशी लगानीमा थप सुधार गरेको पनि उनले बताए। उनले भने, ‘नेपाल–चीन क्रस बोर्डर ‘इकोनोमिक जोन’ बनाउन दुई देशबीच छलफल भइरहेको छ । रेलवे लाइन जोड्न काम पनि भइरहेको छ।’
