मंसिर २३
कञ्चनपुर । कञ्चनपुर प्रहरीले चुरे तथा वन क्षेत्र आसपासका खोलानालामा अवैध तरिकाले उत्खनन् गरिरहेका ६ वटा स्काभेटर नियन्त्रणमा लिएको छ । बेदकोट नगरपालिका ४ स्थित बगुन खोलामा अवैध तरिकाले उत्खनन् भइरहेको समाचार इमेज च्यानलमा प्रसारण भएलगत्तै प्रहरीले ६ वटा स्काभेटरलाई नियन्त्रणमा लिएको हो । सरकारले नदी तथा खोलानालामा उत्खनन गर्दा उपकरणको प्रयोग गर्न नपाइने प्रावधान बनाएपनि कञ्चनपुरमा चुरे वन क्षेत्र आसपासका नदीनालामा अवैध उत्खनन् भइरहेको छ ।
गिट्टीबालुवा उत्खननका लागि ठेक्का दिएको बेदकोट नगरपालिका अवैध उत्खनन् बारे मौन देखिएपछि स्थानीय प्रशासनले चासो देखाएको हो । बगुन खोलामा अवैध तरिकाले उत्खनन् गरिरहेका स्काभेटरहरु नियन्त्रणमा लिएर कारवाही अगाडी बढाइएको कञ्चनपुरका प्रमुख जिल्ला अधिकारी रामकुमार महतोले जानकारी दिनुभयो । यता बेदकोट नगरपालिकाले भने प्रारम्भिक वातावरण परीक्षण गरिएकाले मापदण्ड अनुसार नै उत्खनन् भइरहेको जनाएको छ । नगरपालिकाले चुरेलगायत पालिकाभित्रका पाँच वटा नदी तथा खोलामा गिट्टी बालुवा उत्खनन्का लागि अमृत कन्सट्रक्सनसँग ८५ लाखमा ठेक्का सम्झौता गरेको छ ।
