सीको भ्रमणले पर्यटन प्रवर्द्धनमा महत्वपूर्ण योगदान : मन्त्री भट्टराई

212

असोज २८,
काठमाडौं । संस्कृति, पर्यटन तथा नागरिक उडड्यनमन्त्री योगेशकुमार भट्टराईले चिनियाँ राष्ट्रपति सी जिनपिङको नेपाल भ्रमणले ‘नेपाल भ्रमण वर्ष–२०२०’ लाई प्रवर्द्धन गर्न महत्वपूर्ण योगदान पुर्‍याउने विश्वास व्यक्त गरेका छन्।

मन्त्री भट्टराईले चिनियाँ राष्ट्रपति सीले नेपालको दुई दिने राजकीय भ्रमणको क्रममा दिएको प्रत्येक ‘स्टेटमेन्ट’ले सो भ्रमण वर्षलाई प्रवर्द्धन गर्न सघाउ पुर्‍याउने विश्वास व्यक्त गरेका हुन्। उनले राष्ट्रपति सीको नेपाल भ्रमणले चिनियाँ बुद्धिष्टलाई लुम्विनीको भ्रमण गर्न पनि अभिप्रेरित गरिरहने अपेक्षा पनि गरे।

‘चिनियाँ राष्ट्रपतिले नेपाल भ्रमणको क्रममा दिनु भएको प्रत्येक स्टेटमेन्टले ‘नेपाल भ्रमण वर्ष–२०२०’ लाई प्रवद्र्धन गर्न महत्वपूर्ण सहयोग पु¥याउने मैले विश्वास लिएको छु,’ मन्त्री भट्टराईको भनाई थियो, ‘यसले बुद्ध धर्ममा आस्था राख्ने चिनियाँ नागरिकलाई पनि लुम्विनीको भ्रमण गर्न थप प्रेरित गर्नेछ।’

मंगलबारबाट काठमाडौंमा सुरु भएको ‘दोस्रो चीन–दक्षिण एशीया सम्मेलन’को उद्घाटन सत्रमा बोल्दै उनले चीन र दक्षिण एशीयाका विद्धान साहित्यको उपस्थितिले पनि ‘नेपाल भ्रमण वर्ष(२०२०’लाई माथि उठाउन महत्वपूर्ण सहयोग पुर्‍याउने पनि बताएका थिए।

त्यस अवसरमा मन्त्री भट्टराईले सांस्कृतिक धरोहरको रुपमा रहेको नेपालमा भूकम्पले ध्वस्त बनाएका सबै सांस्कृतिक सम्पदाको पुनर्निर्माणको कामले तीव्रता पाएको उल्लेख गर्दै दुई वर्षभित्रै पुनर्निर्माणको काम सम्पन्न गरिसक्ने प्रतिबद्धता व्यक्त गरे। कार्तिक ३ गतेसम्म चल्ने सो सम्मेलनमा नेपाल, चीन, भारत, पाकिस्तान, बंगलादेश, श्रीलंका, पाकिस्तानलगायतका देशका प्राज्ञहरूले १६ वटा कार्यपत्र प्रस्तुत गर्नेछन्। यो सम्मेलन पहिलोपटक गत वर्ष चीनको छेन्दु सहरमा आयोजना गरिएको थियो।