नागरिक दैनिक
असोज १०, धनगढी । भारतका विभिन्न सहरमा मजदुरी गर्दै आएका सुदूरपश्चिमेली युवा धमाधम घर फर्कन थालेका छन्। महेन्द्रनगरको गड्डाचौकी र धनगढीको त्रिनगर नाकामा अहिले स्वदेश फर्कनेहरूको घुइँचो देखिने गरेको छ। भारतमा वर्षभरि मजदुरी गरेर दसैं मनाउन घर फर्कने नेपालीले सीमामा भने निकै सास्ती खेप्नुपरेको छ। आफूहरूले कडा मिहिनेत गरेर कमाएको र खाईनखाई जोगाएको पैसा बाटोमै लुटिने गरेको नेपाल फर्कंदै गरेका युवा बताउँछन्। उनीहरूका अनुसार घर फर्कंदै गरेका नेपालीले सीमानाकामा दुव्र्यवहार त खेप्नुपर्छ नै, अनावश्यक पैसासमेत बुझाउनुपर्छ।
बिस्कुटमा विष खुवाएर लुटियो
गोदावरी नगरपालिका–४ का ३८ वर्षीय गोपाल बोहरा र ३२ वर्षीय गणेश नेपाली चेन्नईमा मजदुरी गर्थे। घरपरिवारसँगै दसैं मनाउने भनेर उनीहरू दुवै घर आउन हिँडे। भारतको गजरौलामा खाना खान गाडीबाट उत्रेपछि नेपाली भाषा बोल्ने एक व्यक्तिले परिचितजस्तै व्यवहार गरे र सँगै खाना खाने भन्दै होटलतर्फ लगे। तर दुवैजना मंगलबार बिहान गौरिफन्टा नाकामा गाडीभित्रै अर्धचेत अवस्थामा भेटिए। उद्धारपछि दुवैलाई सेती प्रादेशिक अस्पतालमा उपचारार्थ भर्ना गरिएको त्रिनगर प्रहरी चौकीका प्रहरी नायब निरीक्षक मदनबहादुर सिंहले बताए।
‘नेपाली भाषा बोल्ने र परिचितले जस्तै व्यवहार गर्ने एकजनाले एकएकवटा बिस्कुट खान दिएको थियो,’ सेती प्रादेशिक अस्पतालमा उपचारपछि होसमा आएका गोपालले भने, ‘त्यसपछि के भयो, केही थाहा भएन।’ उनका अनुसार दुवैजनाबाट ५०/५० हजार गरी १ लाख रूपैयाँ लुटिएको छ। ‘अस्पतालमा ल्याइपु¥याउँदा दुवै होसमा थिएनन्,’ आकस्मिक कक्ष प्रमुख कृष्ण बोहराले भने, ‘वर्षभरि कमाएको सबै पैसा लुटिएछ। उनीहरूको अवस्था देखेर निकै दुःख लाग्यो।’
भारतका विभिन्न सहरबाट मजदुरी गरेर फर्कने नेपाली मजदुर बीच बाटामै विष मिसाएको खानेकुरा खुवाएर लुटिने घटना बर्सेनि भइरहन्छन्। अर्काको ठाउँमा पसिना बगाएर सस्तोमा श्रम बेचेर कमाएको पैसा पनि घर पु-याउन नपाउने अवस्था अन्त्य गर्न सरोकारवालाबाट पहल नभएको उनीहरूको गुनासो छ।
