असार १५,
काठमाडौँ । धादिङको बेनिघाटमा आइतवार भएको सवारी दुर्घटनामा परी २ जनाको मृत्यु भएको छ । बेनिघाट रोराङ गाउँपालिका वडा नम्बर ७ कृष्णभीरमा तीनवटा सवारी साधन एकआपसमा ठोक्किएर दुर्घटना हुँदा २ जनाको मृत्यु भएको जिल्ला प्रहरी कार्यालय धादिङका प्रवक्ता डीएसपी रुपक खड्काले जानकारी दिए । काठमाडौंबाट चितवनतर्फ जाँदै गरेको लु१ख ९०७९ नम्बरको बस र चितवनबाट काठमाडौं आउँदै गरेका बा३ख १००४ र बा२ख ४५६७ नम्बरका माइक्रोबस एक आपसमा ठोक्किएका थिए ।
मृतक एक पुरुष र एक महिला छन् । जसमध्ये एकजना धादिङ महादेवस्थानका २७ वर्षीय श्यामकुमार श्रेष्ठ रहेको डीएसपी खड्काले बताए । महिलाको पहिचान खुलेको छैन । दुर्घटनामा ३२ जना घाइते भएका छन् । घाइतेमध्ये १८ जनालाई उपचारका लागि काठमाडौं पठाइएको डीएसपी खड्काले लोकान्तरलाई जानकारी दिए । अन्य ७ जनाको गजुरी र २ जनाको चरौंदीमा उपचार भइरहेको छ । अन्य केही भने सामान्य उपचारपछि डिस्चार्ज भइसकेको डीएसपी खड्काले बताए ।
