एजेन्सी, असार ३,
भारत सरकारले इन्सेफ्लाइटिसको महामारीबाट १०० जना भन्दा बढी बालबालिकाको ज्यान गएपछि भारत सरकारले करिब १०० जना स्वास्थ्य अधिकारी बिहारको उक्त प्रभावित क्षेत्रमा पठाएको छ । भारतीय पूर्वी राज्य बिहारहको मुजफ्फरपुर जिल्लामा इन्सेफ्लाइटिसको प्रकोप बढेको हो । उक्त जिल्लामा मात्र यस प्रकोपबाट १०० जनाभन्दा बढी बालबालिकाको ज्यान गएको बताइएको छ ।
त्यहाँको राज्य सरकारलाई औषधि उपचारका साथै रोगजन्य विषयमा आवश्यक सहयोग र अनुसन्धान गर्नका लागि उक्त उच्चस्तरीय टोली त्यसतर्फ पठाएको बताइएको छ । बिहार सरकारको स्वस्थ्य मन्त्रालयले दिएको जानकारीअनुसार उक्त महामारीको नियन्त्रणका लागि भारतको केन्द्रीय सरकारले बिहारको उक्त जिल्लाका विभिन्न स्थानमा अत्याधुनिक प्रयोगशालाहरु पनि राखेको छ । उक्त मन्त्रालयले पछिल्लो समयमा बिहारका अरु जिल्लामा पनि यस प्रकोपको खतरा बढ्दै जाने आशंका उत्पन्न भइरहेकोले अरु जिल्लामा पनि यस्तो खालको प्रयोगशाला राख्ने जानकारी गराएको बतायो ।
भारत सरकारका स्वास्थ्यमन्त्री हर्ष वर्धनले बिहारमा देखिएको उक्त महामारीको नियन्त्रणका लागि सरकारले आवश्यक पहल गरेको जानकारी दिए । उनले बिहार सरकारले विभिन्न स्थानमा अनुसन्धान केन्द्र तथा प्रयोगशाला राखेर काम गरिरहेको जानकारी पनि दिनुभएको समाचारमा जनाइएको छ । सोमबार मात्र भारतीय समाचारदाताहरुसँग कुरा गर्दै स्वास्थ्यमन्त्री हर्षवर्धनले केन्द्र सरकारले उक्त महामारी नियन्त्रणका लागि र प्रभावितहरुको उपचारका लागि आवश्यक सहयोग गरिरहेको जानकारी गराए । उनले भने– हामीले यस महामारीको अवस्थाको निकै गहिरोसँग अनुगमन गरिरहेका छौँ र के कति कारणले यहाँ यो महामारी फैलिएको हो भन्ने बारेमा अनुसन्धानका लागि पनि हामीले पहल गरिहेका छौँ ।
श्रीकृष्ण मेडिकल कलेजका सुपरीन्टेन्डेन्ट सुनिलकुमार शाहीका अनुसार उपचारका लागि कलेजको अस्पतालमा भर्ना भएका ८३ बालबालिकाको मृत्यु भएको छ । मुजफरपुरकै केजरीवाल अस्पतालमा भर्ना भएका अरु १७ बालबालिकाको मृत्यु भएको छ । इन्सेफलाइटिसबाट मृत्यु भएका व्यक्तिका परिवारलाई जनही चार लाख भारतीय रुपैयाँ उपलब्ध गराउने विहारका मुख्यमन्त्री नितिश कुमारले घोषणा गरिसकेका छन् । मुख्यमन्त्री नितिशकुमारले रोगविरुद्ध लड्न सबै स्वास्थ्य निकायहरुलाई सक्रियतापूर्वक काममा जुट्न निर्देश गरेका छन् । इन्सेफलाइटिस भएमा यसले उच्च ज्वरो आउने, टाउको दुख्ने र पक्षाघात समेत हुने गर्दछ । गत साता विहारका स्वास्थ्यमन्त्री मङ्गल पाण्डेले विज्ञहरुको टोलीले इन्सेफलाइटिस रोग लाग्नुका मुख्य कारणहरुको पहिचान गरेको बताएका थिए । –एएफपी
