काठमाडौँ माघ ८,
युएईसँगको वान डे र टी–२० सिरिज खेल्न नेपाली राष्ट्रिय क्रिकेट टोली आज त्यसतर्फ प्रस्थान गर्दैछ । १६ सदस्यीय नेपाली टोली अपरान्ह साडे ४ बजे युएई जाने टोलीका टिम म्यानेजर रमन सिवाकोटीले जानकारी दिनुभयो । नियमित कप्तान पारस खड्काको कमानीमा घोषणा गरिएको टोलीमा भीम सार्कि, अबिनास बोहोरा, सन्दिप झोरा र पवन सर्राफले सिनियर राष्ट्रिय टोलीमा डेब्यु गरेका छन् । शुक्रबारबाट सुरु हुने सिरिजका लागि ४ नयाँ अनुहारलाई समेट्दै शनिबार राष्ट्रिय टोलीको घोषणा गरिएको थियो । बंगलादेश प्रिमियर लिग बिपीएल खेलेर हिजो काठमाण्डौ आईपुगेका लेग स्पिनर सन्दिप लामिछानेपनि टोलीसंगै आज युएई जाने छन् । नेपालले घरेलु टोलीसंग माघ ११, १२ र १४ गते वान डे र माघ १७, १८ र २० गते ट्वान्टी २० क्रिकेट खेल्नेछ । नेपालसंगको खेलका लागि युएईले महम्मद नाभेदको कमानीमा यसअघि नै टोलीको घोषणा गरिसकेको छ ।
