बझाङ । नेपाल कम्युनिस्ट पार्टी एमाले जिल्ला कमिटी, बझाङको अधिवेशन आइतबार सम्पन्न भएको छ । अधिवेशनले दिलबहादुर भण्डारीको अध्यक्षतामा नयाँ नेतृत्वसमेत चयन गरेको छ । एमालेको निर्वाचन कमिटीले सार्वजनिक गरेको नतिजाअनुसार भण्डारीले अध्यक्ष पदका प्रतिस्पधी कलकबहादुर खड्कालाई ५५ मतले पछि पार्दै जित हात पारेका छन । भण्डारीले २०८ मत प्राप्त गर्दा खड्काले १५३ मत पाएको निर्वाचन कमिटीले जनाएको छ ।
यस्तै अधिवेशनले जिल्ला कमिटी उपाध्यक्षमा तलकोट गाउँपालिकाका पूर्वअध्यक्ष लालबहादुर विष्टलाई निर्वाचित गरेको छ । उनले दुर्गाथली गाउँपालिकाका पूर्वअध्यक्ष प्रयागराज जोशीलाई पराजित गरेका छन् । सचिवमा लोकेन्द्रबहादुर सिंहलाई पराजित गर्दै नयनबहादुर बोहरा निर्वाचित भएका छन् । उनीहरू दुवै जना विद्यार्थी राजनीतिक पृष्ठभूमिबाट आएका हुन् । त्यसैगरी खुला उपसचिवमा पञ्कज भण्डारी र महिला उपसचिवमा राधा विष्ट चयन भएका छन् ।
