जनयुद्ध दिवस मनाउने निर्णय एमाले सरकारमा हुँदै भएको हो : पुन

काठमाडौं : नेकपा माओवादी केन्द्रका उपमहासचिव वर्षमान पुनले एमाले सरकारमा भएको बेलामा नै फागुन १ गतेलाई जनयुद्ध दिवसको रूपमा मनाउने निर्णय भएको बताएका छन्। बिहीबार बसेको प्रतिनिधिसभाको बैठकमा बोल्दै पुनले एमाले सरकारमा रहको बेलामा नै जनयुद्ध दिवस मनाउने निर्णय भएको बताएका हुन्। ‘पूर्ववक्ता माननीयज्यूले फागुन १ गतेलाई दिवसको रुपमा मनाउन नहुने भन्नुभयो तर उहाँ उपप्रधानमन्त्री भएका वेला माघ १९ गते यो दिवस मनाउने निर्णय भएको हो’ ,उनले भने। एमाले उपाध्यक्ष विष्णु पौडेलले फागुन १ गतेलाई जनयुद्ध दिवसको रुपमा मनाउन संसद्‌बाट प्रस्ताव पारित गर्न सरकारलाई चुनौती दिएका थिए। उनले फागुन १ गते कुनै पनि हालतमा उत्सव हुन नसक्ने टिप्पणी गरेका थिए।