काठमाडौँ । नेपाल विद्युत् प्राधिकरणले विद्युतीय पोल प्रयोग गरी अव्यवस्थित तानिएका र प्रयोगमा नरहेका अनावश्यक तार तत्काल व्यवस्थापन गर्न इन्टरनेट, केबल टिभी र दूरसञ्चार सेवा प्रदायकलाई अनुरोध गरेको छ । यसको पालना नभए प्राधिकरण आफैँले तार हटाइदिने चेतावनी समेत दिएको छ । प्राधिकरणले यसअघि १५ कात्तिक र १८ पुस २०७९ मा यस्तै अनुरोध गरेको थियो ।
सो निर्देशनको पालना नभएको भन्दै प्राधिकरणले मङ्गलवार यस्तो चेतावनी दिएको हो । पछिल्लो समय अव्यवस्थित तार हटाउन स्थानीय तह समेत अग्रसर भएका छन् । यस्ता तार हटाएर शहरी सुन्दरता कायम राख्न, आगलागीलगायत विद्युतीय दुर्घटना न्यूनीकरण गर्दै भरपर्दो विद्युत् सेवा उपलब्ध गराउन समेत प्राधिकरणले सरोकारवालालाई अनुरोध गरेको छ ।
प्राधिकरणले अप्टिकल फाइबर केवल र विद्युत् लाइन तथा भू-सतहको न्यूनतम भर्टिकल क्लियरनेस कायम गर्नेबारे मापदण्ड समेत तोकेको छ । जसमा ४०० भोल्ट लाइन (नाङ्गो तार)मा ८० सेमी, ४०० भोल्ट लाइन (इन्सुलेटेड तार)मा ३० सेमी, ११ केभी-३३ केभीमा २ मिटर र अन्य ४०० भोल्टका उपकरणमा ७५ सेमीको दूरी राख्ने गरी तोकिएको छ । अप्टिकर फाइबर र जमिन सतहबीचको न्यूनतम दूरी भने पैदल मार्गमा २.४ मिटर र सडक मार्गमा ५.५ मिटर कायम गर्नु पर्ने भएको छ ।
राउटर, रिपेटर, अप्टिकल फाइबर डिष्ट्रिब्युसन बक्स र जोइन्ट क्लोजरजस्ता उपकरणहरू पोलको एउटै मात्र साइडमा मिलाएर नझर्ने, नहल्लिने गरी राख्न र सफासँग क्लिप, ब्याण्ड प्रयोग गरी वायरिङ गर्न समेत प्राकिधकरणले सचेत गराएको छ । प्रयोगमा नरहेका सबै तार र उपकरण तत्काल हटाउनु पर्ने भएको छ । प्राधिकरणको पोलमा क्वाइलरलूप बनाएर राखिएका केवल तारहरू तत्काल हटाउन र नयाँ केवल तान्दा अतिरिक्त लम्बाइको केबललाई क्वाइलरलुप बनाएर झुण्डाउने काम नगर्न समेत प्राधिकरणले भनेको छ ।
