बैंकको ब्याज वृद्धि, व्यवसायीहरूको विरोध प्रदर्शन

101

काठमाडौँ । बैंकहरूले मन लाग्दीरुपमा ब्याज वृद्धि गरेको भन्दै धनगढीका व्यवसायीहरूले विरोध प्रदर्शन गरेका छन् । बैंकको चर्को ब्याजदरविरुद्ध चरणबद्ध आन्दोलनमा उत्रिएका व्यवसायीहरू धनगढीमा विरोध प्रदर्शनसँगै मुख्यमन्त्री कार्यालय अगाडि धर्ना समेत दिएका हुन् । शुक्रबार सुदूरपश्चिम मोबाइल व्यवसायी सङ्घले विरोध कार्यक्रम आयोजना गरेको हो ।

कैलाली उद्योग वाणिज्य सङ्घका उपाध्यक्ष पुष्कर ओझाले ८ प्रतिशतमा लिएको ऋणको ब्याज वर्षदिन नपुग्दै आफू खुसी १७ प्रतिशत पुर्याएको भन्दै आक्रोश पोखे । विगतमा ऋण लिँदा ६-७ प्रतिशत रहेको ब्याजदर एकाएक १७-१८ प्रतिशत पुर्याउदा आफूहरू मारमा परेको व्यवसायीको गुनासो छ । बैंकले किस्ता तिर्न बारम्बार फोन गरी यातना दिन थालेपछि आफूहरू बाध्य भएर सडक आन्दोलनमा उत्रिनु उनले परेको बताएका छन् ।

बैंक तथा वित्तीय संस्थाको नियमन गर्ने निकाय नेपाल राष्ट्र बैंक पनि मौन भएर बस्दा बैंकले मनोमानी रूपमा ब्याज बढाइरहेको समेत उनीहरूले आक्रोश पोखेका हुन् । व्यवसायीहरूले कर्जाको ब्याजदर ९ प्रतिशतभन्दा कम हुनुपर्ने, कर्जा प्रवाह गर्दा बैङ्कहरूले विभिन्न शीर्षकमा सेवा शुल्क लिन नहुने, पुरानो चालु पुँजी कर्जा निर्देशिकालाई कायम राखी नयाँ निर्देशिकालाई क्रमिक रूपमा लागू गर्नुपर्ने, धितो लिलामी प्रक्रिया २०७९ चैतसम्म कायम राख्नुपर्ने साथै राष्ट्र बैंकले जारी गर्ने रिपोर्ट एक प्रतिशतमा झार्नुपर्ने लगायतका माग राखेका छन् ।

यसैबीच व्यवसायीहरूले मुख्यमन्त्री कमल बहादुर शाहलाई ज्ञापनपत्र समेत बुझाएका छन् । व्यवसायीहरूको ज्ञापनपत्र बुझ्दै मुख्यमन्त्री शाहले आफू व्यवसायीहरूकै पक्षमा रहेको बताए ।