काठमाडौं । श्रम, रोजगार तथा समाजिक सुरक्षामन्त्री शेरबहादुर कुँवरले आफ्नो कार्यकालमा भएका कामहरुको विवरण सार्वजनिक गरेका छन् । उनले आन्तरिक रोजगारी सिर्जना गरेकोदेखि निःशुल्क भिसा र टिकटमा श्रमिकलाई विदेश पठाएकोसम्मका विषय समेटेर आफ्नो कार्यकाल फलदायी भएको दावी गरेका छन् ।
नयाँ मन्त्रीमण्डल गठन हुनुअघि सिंहदरबारमा पत्रकार सम्मेलन गर्दै कुँवरले आफ्नो कार्यकालको उपलब्धिलाई ५३ बुँदामा व्याख्या गरेका छन् । जसमा मन्त्रालयको दैनिक कार्यसम्पादनदेखि विभिन्न स्तरमा श्रम गन्तव्य देशसँग भएको बैठकका उपलब्धि समेत समेटिएका छन् ।
कुँवरका अनुसार रोजगारी सम्बन्धी कार्यक्रमहरुको एकीकृत तथ्यांक व्यवस्थापनका लागि राष्ट्रिय रोजगार व्यवस्थापन सूचना प्रणालीको विकास गर्ने र रोजगारीको एकीकृत राष्ट्रिय प्रणालीको ढाँचा सिफारिस गरिएको छ ।
श्रमिक अस्पतालको निर्माण सम्भाव्यता अध्ययन कार्यदलले अस्पताल निर्माण सम्भाव्य स्थल र सञ्चालनका लागि जग्गाको पहिचान भएको र श्रमिक अस्पताल निर्माणका लागि विस्तृत परियोजना प्रतिवेदन तयार गर्ने कार्य भइरहेको उल्लेख गरेका छन् ।
