धादिङ । धादिङमा श्रीमान्-श्रीमतीको विभत्स हत्या भएको छ । हिजो (आइतबार) राति उनीहरुको हत्या भएको जिल्ला प्रहरी कार्यालयले जनाएको छ ।
जिल्लाको त्रिपुरासुदरी गाउँपालिका–३ आहालेमा श्रीमान्–श्रीमतीको विभत्स हत्या भएको हो । घरमा सुतिरहेको अवस्थामा ६२ वर्षीय श्रीमान् विष्णु बहादुर आलेमगर र ६० वर्षीया श्रीमती निरमाया आलेमगरको विभत्स हत्या भएको प्रहरी कार्यालय धादिङका सूचना अधिकारी प्रहरी नायव उपरीक्षक श्याम खत्रीले जानकारी दिए ।
खत्रीका अनुसार, ‘जवरजस्ती करणी पश्चात् धारिलो हतियार प्रहार गरि हत्या गरेको हुनुसक्ने आशंका गरिएको छ ।’ यतिबेला घटनास्थलमा प्रहरी परिचालन गर्नुका साथै हत्यामा संलग्नको खोजी भइरहेको प्रहरीले बताएको छ । दुई जना मात्रै रहेको घरमा श्रीमान् विष्णुवहादुरको निधारमा र दाहिने आँखामा गहिरो चोट लागेको छ ।
उनकी श्रीमती निरमायाको नाडीका चुरा फुटेको र शरीरको अन्य भागमा चोटपटक लागेको अवस्थामा मृत शव भेटिएको वडाअध्यक्ष कमल थापाले बताए । एकान्तमा घर भएकोले घटना घटेको जानकारी नभएको स्थानीय बासीन्दाले बताए । हुलाक सेवाका पूर्व कर्मचारी समेत रहेका विष्णुबहादुर आलेमगरका एक छोरा छन् । उनी काठमाडौंमा बस्दै आएका छन् ।
