कास्की । ८४ वर्ष उमेर पूरा गरेका भारतीय सेनाका पूर्व मेजर जनरल अशोक मेहता सँगै ११ जनालाई पोखरामा एक कार्यक्रम आयोजना गरी सम्मान गरिएको छ ।
२/५ जी आर (एफ एफ) (भी सी पल्टन) पूर्व सैनिक परिवार पोखराको १३६ औ जन्म जयन्ती (माला काण्ड डे) को अवसरमा आयोजना गरिएको शुभकामना आदान प्रदान कार्यक्रममा ८४ वर्ष उमेर पुगेका पल्टनका सदस्य र उनीहरूका परिवारलाई सम्मान गरिएको हो । कार्यक्रममा कार्यक्रमका प्रमुख अतिथि मेहता सँगै १०४ वर्षका राम प्रसाद गुरुङ गरी ११ जनालाई सम्मान गएिको थियो ।
आफना पल्टनका पूर्व सैनिक परिवारसँग आफ्नो ८४ औ जन्मोत्सव मनाउन मेहता पोखरा आएका हुन् । चार वर्ष अघि मेहताले आफ्नो ८०औँ जन्मोत्सव समेत पोखरामा मनाएका थिए । पोखरा महानगरपालिका ३२ लामे आहाल स्थित बुद्धिमान गुरुङको घरमा आफ्नो ८०औँ जन्मोत्सव मनाउने क्रममा मेहताले सोही दिन आफ्नो ८४ वर्षको जन्मोत्सव समेत पोखरा आएर मनाउने बताएका थिए । सन १९९३ मा अदितीसँग पल्टनमा र त्यसपछि पोखराको विन्ध्यवासिनी मन्दिरमा आई उनले बिहे समेत गरेका थिए ।
कार्यक्रममा विभिन्न विषयमा स्नातक तह उत्तीर्ण गरेका सैनिकका परिवारका ९ जनालाई सम्मान गरिएको आयोजक २/५ जी आर (एफ एफ) (भी सी पल्टन) पूर्व सैनिक परिवार पोखराका अध्यक्ष सुदर्शनसिंह थापाले जानकारी दिए ।
आयोजक संस्थाका सचिव दल बहादुर गुरुङका अनुसार समितिले वर्षमा दुई पटक भि सि डेका अवसरमा २६ जुनमा र माला काण्ड डे का अवसरमा १० नेभेम्वर गरी वर्षको दुई पटक विशेष कार्यक्रम आयोजना गरी वार्षिकोत्सव मनाउने गरेको छ ।
