काभ्रे । नेकपा एमालेबाट विभाजन भएको नेकपा समाजबादीका नेता कार्यकर्ताहरु धमाधम पार्टीमा फिर्ता हुन थालेका छन् । नेकपा समाजबादीले गठवन्धनबाट उचित स्थान नपाउनु तथा पार्टी फुटाउँदाको उदेश्य अनुरुप पार्टी संचालन नहुनु लगायतका थुप्रै कारण देखाउँदै समाजबादीका नेता कार्यकर्ताहरु घर फर्किन थालेका हुन् ।
काभ्रेपलाञ्चोक जिल्लाको पनौती नगरपालिका वडा नम्वर १२ को सिङ्गो कमिटी नै एमालेमा विलिन भएको घोषणा गरेको छ । सोहि वडामा नेकपा समाजबादीले ६ मतले एमालेका उम्मेदवारलाई पराजय गराउँदै वडा अध्यक्ष पदमा विजयी हासिल गरेको थियो ।
वडा अध्यक्ष बाहेक नेकपा समाजबादीका सबै नेता कार्यकर्ता एमालेमा फर्किएको घोषणा गरेका छन् । उक्त वडा स्थायी घर भएका नेकपा समाजबादीका जिल्ला अध्यक्ष बसुन्धरा हुमागाई प्रदेशमा कृषि मन्त्री छन् । उनले प्रतिनिधि सभा निर्वाचन क्षेत्र नम्वर २ को २ बाट उम्मेदवार दिएर गठवन्धनका कारण फिर्ता लिएका थिए । यस अघि वडा नम्वर ११ बल्थलीको सिङ्गो कमिटी नै एमालेमा फर्किएको थियो ।
