जनकपुरधाम । महोत्तरीको भंगहा नगरपालिकामा दुई समुदायबीच झएको झडपमा संलग्नलाई कारबाही गर्ने निर्णय भएको छ।
शुक्रबार बसेको सर्वदलीय बैठकबाट बिहीबार हिन्दु र मुस्लिम समुदायबीच भएको झडपमा संलग्न रहेको दोषीलाई कारबाही गर्ने निर्णय भएको प्रमुख जिल्ला अधिकारी दीपक कुमार पहाडीले जानकारी दिए।
बैठकले भंगाहा नगरपालिका-८ को पररियामा हिन्दु वाहिनी सेना सम्राटबाट छठ पर्वको अवसरमा निकालिएको कलश तथा झण्डा यात्राको क्रममा असमझदारीका कारण दुई पक्षबीच झडप भएकाे हाे।
सामाजिक सद्भाव कायम गर्न घटनामा सम्बद्ध दुवै पक्षलाई र आम नागरिकलाई आह्वान गर्ने, घटनामा भएको धनजनको क्षतिको विवरण संकलन गरी क्षतिपूर्तीको सिफारिस गर्न टोली गठन गर्ने र घाइतेको शीघ्र स्वास्थ्यलाभको कामना गर्दै तत्काल उपचार खर्चको लागि आवश्यक व्यवस्था गर्न गृह मन्त्रालय मार्फत् नेपाल सरकारमा अनुरोध गर्ने लगायतका निर्णय गरेको प्रजिअ पहाडीले बताए।
यस्तै, घटनामा संलग्न दोषी पत्ता लगाई कानुनी पक्रिया बमोजिम कारबाही अगाडि बढाउने, घटनाको छानविनको लागि उच्च स्तरीय टोली गठन गर्न गृह मन्त्रालयसँग अनुरोध गर्ने, परिस्थितिलाई काबुमा राख्ने तथा सामाजिक सद्भाव कायम गर्न सदभाव र्याली गर्ने, दलगत रूपमा शान्ति कायम गर्न अपिल गर्ने लगायतका कार्य, जिल्लामा कृयाशिल राजनैतिक पार्टी र समाजिक अगुवा संलग्न सर्वदलीय/सर्वपक्षीय संयन्त्रले गर्ने निर्णय भएको प्रजिअ पहाडीले बताए।
पररियामा लगाइएको कर्फ्यु भने यथावत नै राखिएको छ।
