काठमाडौँ । म्यान्मारको कुख्यात इन्साइन जेलमा विष्फोट भएको छ । मुलुकको सबैभन्दा ठूलो सहर यङ्गुनमा रहेको उक्त जेलमा विष्फोट हुँदा ८ जनाको मृत्यु भएको बीबीसीले जनाएको छ ।
जेलको प्रवेशद्वारमा दुईवटा पार्सल बम विष्फोट भएको जनाइएको छ । विष्फोटमा मृत्यु हुनेमध्ये तीन जना जेलका कर्मचारी र ५ जना जेल भ्रमणमा आएका मानिसहरु रहेको बीबीसीले जनाएको छ । मृतकमध्ये केही महिला र बन्दीका आफन्तहरु समेत रहेको जनाइएको छ । उक्त जेलमा १० हजार बन्दी राखिएको बताइन्छ । तीमध्ये अधिकांश राजनीतिक बन्दीहरु रहेका छन् ।
आक्रमणको जिम्मा हालसम्म कुनै पनि समूहले लिइसकेको छैन । विष्फोटमा अरु १८ जना घाइते भएका छन् । अधिकारीहरुले जेलको हुलाकगृहमा बम विष्फोट भएको बताएका छन् । अर्को विष्फोट नभएको एउटा बम प्लास्टिकले बेरेर राखेको अवस्थामा पछि फेला परेको थियो । पूर्व राजधानी सहरमा रहेको उक्त जेल विशाल क्षेत्रफलमा फैलिएको छ । उक्त जेलभित्र बन्दीहरुमाथि यातना, दुव्र्यवहार र अन्य अमानवीय घटना हुने गरेको आरोप लाग्दै आएको छ ।
