असार १९,
काठमाडौं । अविरल वर्षापछिको पहिरोका कारण हेटौंडा–काठमाडौं जोड्ने सबै मार्ग अवरुद्ध भएको छ । बिहीबारदेखि लगातार परिरहेको वर्षाका कारण मकवानपुरको विभिन्न स्थानमा पहिरो खसेपछि हेटौंडा–काठमाडौं जोड्ने सबै मार्ग अवरुद्ध भएको हो । हेटौंडाबाट काठमाडौं जोड्ने त्रिभुवन राजपथ अन्र्तगतको हेटौंडा–भैसे–पालुङ–नौबिसे काठमाडौं सडक खण्डको भीमफेदी गाउँपालिका वडा नम्बर–१ बाघझोरामा बाढीका कारण सडकमा अवरोध भएको छ भने भिमफेदी–९ अघोर, थाहा नगरपालिका वडा नम्बर–६ खानीगाउँ, थाहा नगरपालिका–१२ गैरीगाउँमा पहिरो खस्दा उक्त सडक अवरुद्ध भएको हो ।
त्यस्तै काठमाडौं जोडने छोटो दुरीको मार्ग भैस–कुलेखानी–भिमफेदी–काठमाडौं जोड्ने २ वटा सडक फाखेल–हुमाने र सिस्नेरी–दक्षिणकाली सडक खण्ड पनि पहरोका कारण अवरुद्ध भएको जिल्ला प्रहरी कार्यालय मकवानपुरले जनाएको छ । उक्त सडक खण्डको भिमफेदी गाउँपालिका वडा नम्बर–२ पान्द्राङ, भिमफेदी–६ गढी, देराली, फाखेल–हुमाने सडक खण्ड तर्फको इन्द्रसरोवर गाउँपालिका वडा नम्बर–४ महालक्ष्मी खोला, ईन्द्रसरोबर–२ कुलेखानीमा पहिरो कारण सडक अवरुद्ध भएकोे प्रहरीले जनाएको छ ।
यता कान्तीलोकपथ अन्तर्गत भिमफेदी गाउँपालिका वडा नम्बर–८ गंगटेमा वर्षका कारण कालोपत्रे नै बगाउँदा सडक अवरुद्ध भएको छ । कान्तिलोकपथ अन्तर्गत ललितपुरको भट्टेडाडामा पनि पहिरो खसेर सडक अवरुद्ध भएको जिल्ला प्रहरी कार्यालय मकवानपुरका प्रहरी निरीक्षक देवेन्द्र दासले बताए ।
