कार्तिक १४,
निर्देशक जोन योञ्जनको निर्देशनमा तयार भएको फिल्म ‘१२ सत्ताईस’को पहिलो पोस्टर सार्वजनिक गरिएको छ । सार्वजनिक पोस्टरमा फिल्मका सम्पूर्ण प्रमुख पात्रहरुलाई स्थान दिइएको छ । यो फिल्मबाट जोन योञ्जनले निर्देशनमा डेब्यु गर्दैछन् । कमेडी जनराको फिल्ममा समिर श्रेष्ठ, अभिषेक नेपाल, काजि राना, अस्मिता लामिछाने, समरांत थापा, अभोन राज उप्रेती, भिष्म जोशी, अस्मिता खनाल, बिना कार्की लगायत कलाकारको अभिनय रहेको छ । फिल्मले ३ जना युवा बेरोजगारहरुको कथा समेटेको छ । ‘उत्कृष्ट फिल्म बनाउन स्टार काष्ट नै चाहिन्छ भन्ने छैन कथा र पात्र बलियो भए राम्रो फिल्म बन्छ र हाम्रो फिल्मले दर्शकको मन जित्छ’ निर्देशक जोन योञ्जनले भने । यो फिल्मको कथा निर्देशक योञ्जनले तयार पारेका हुन् । ह्याप्पी प्ल्यानेट फिल्मस र कमेरो फिल्म स्क्रिनको संयुक्त ब्यानरमा निर्माण भएको यस फिल्मलाई रेणु राना, दिपक खातिवडा र रुपक थापाले निर्माण गरेका छन् । अनिश स्याङ्गदेनले खिचेको फिल्मलाई कृष्ण भण्डारीले सम्पादन गरेको हुन् । यो फिल्म मंसिर २७ गते देखि प्रर्दशन हुनेछ ।
