असोज ९, बिहेअघि यौन सम्बन्ध राख्न नपाइने प्रस्ताव कानूनमा गरिएपछि इन्डोनेशियामा बिरोध भएको छ । संसदले यस बारे प्रताव गरेको कानूनको विरोधमा प्रदर्शनकारीहरुले संसदबाहिर समेत प्रदर्शन गरेका छन् । प्रदर्शनकारीहरूविरुद्ध प्रहरीले अश्रुग्यास र पानीको फोहरा प्रहार गरेको बीबीसीले जनाएको छ । प्रस्तावित कानुनमा बिहेअघि यौन सम्बन्ध राख्न नपाइने प्रावधान तथा अन्य विवादास्पद कुरा राखिएपछि इन्डोनेशियामा त्यसको चर्को विरोध भएको हो । उक्त मस्यौदा कानुनविरुद्ध देशका अन्य स्थानमा पनि विरोध भएको थियो । मस्यौदा कानुन पारित भएर कानुन कार्यान्वयनमा आएमा त्यसले गर्भपतनलाई प्रतिबन्ध लगाइदिनेछ भने देशका राष्ट्रपतिको अपमानलाई पनि अपराध मान्नेछ। तत्कालका लागि उक्त मस्यौदा कानुनलाई पारित गर्ने विषय पछि सरेको छ। तर प्रदर्शनकारीहरू त्यो संसद्बाट अन्ततस् पारित हुने चिन्तामा छन् ।
उक्त कानूनमा विवाहपूर्व यौन सम्बन्ध राख्नु अपराध हुनेछ र त्यसो गरेमा एक वर्ष जेल सजाय हुन सक्ने लगायतको प्रावधान राखिएको छ । विवाह नगरी सँगै बसेमा छ महिनाको जेल सजाय हुन सक्ने व्यवस्था प्रस्तावित कानूनमा गरिएको छ । राष्ट्रपति, उपराष्ट्रपति, धर्म, राज्यका निकाय र झण्डा तथा राष्ट्रिय गानजस्ता प्रतीकको अपमान गर्न पाइनेछैन, चिकित्सकीय कारण वा बलात्कारका घटनामा बाहेक गर्भपतन गरे अधिकतम चार वर्ष जेल सजाय हुन सक्ने लगायतका प्रावधान राखिएको भन्दै त्यसको विरोध भएको छ । संसद्मा मङ्गलवार उक्त प्रस्तावित कानुनमा मतदान हुने योजना थियो । तर राष्ट्रपति जोको विडोडोले त्यसमा थप विचार गर्नुपर्ने भन्दै मतदान शुक्रवारका लागि स्थागित गरिदिए । मतदान सारिएको भए पनि इन्डोनेशियालीहरू उक्त कानुन संसद्बाट पारित हुने आशङ्का व्यक्त गर्छन्। एजेन्सी
