असोज ५,
चरिकोट । दोलखाको बिगु गाउँपालिका–८ चिलङ्खामा सडक निर्माणमा प्रयोग गरिएको डोजरले ठक्कर दिँदा एक बालकको ज्यान गएको छ । बिगु गाउँपालिका–८ चिलङ्खास्थित झोरुङसोरुङ सावा सडकखण्डको बाटो मर्मत गर्ने क्रममा शनिबार ४ बजे ठक्कर दिँदा रोजन खड्काको ज्यान गएको जिल्ला प्रहरी कार्यालय दोलखाले जनाएको छ ।
बिगु गाउँपालिका–५ चिलङ्खा घर भई सोरुङमा व्यवसाय गरी बसेका रमेश खड्काका ४ वर्षीय छोरा रोजन खड्कालाई डोजरले ठक्कर दिएको र उनको घटनास्थलमै मृत्यु भएको प्रहरी निरीक्षक रमेश बोहोराले जानकारी दिए । मृतक बालकको शव परीक्षणका लागि चरिकोट ल्याइएको र ठक्कर दिने बा ३ क १२०६ नम्बरको जेसिबी ब्याक लोडर प्रहरीले नियन्त्रणमा लिएको जनाइएको छ ।
