जेठ २२,
सिन्धुपाल्चोक। कालिका महिला संजालको आयोजनामा महिलाहरुको सिप विकास र आत्मनिर्भरताका लागि ३ दिने साबुन बनाउने तालिम सुनकोशी गाउँपालिकामा सम्पन्न भएको छ । जेठ १६ गते देखि सञ्चालित तालिम गत १८ गते कालिका महिला संजालको अध्यक्ष इन्द्रमाया खत्रीको अध्यक्षता र सुनकोशी गाउँपालिका-३ का वडा अध्यक्ष रामहरी खड्काको प्रमुख अतिथ्यतामा शनिबार एक कार्यक्रमविच तालिमको समापन गरिएको हो । कार्यक्रममा अध्यक्ष खत्रीले तालिम दिनुको उद्देश्यमाथि प्रकाश पार्दै विपन्न महिलाहरुलाई उद्यमी बनाउने आफूहरुको उद्देश्य रहेको बताएकी थिइन् । तालिमबाट विपन्न महिलाहरुको आर्थिक क्रियाकलापमा वृद्धि हुने र यसबाट महिलाहरु आत्मनिर्भर हुने उनको बिश्वास छ।
तालिमको समापन सत्रमा बोल्दै सहभागीहरुको तर्फबाट कल्पना गिरि, भद्रकुमारी प्याकुरेल, रमा कार्की र पबित्रा थापामगरले आयोजकहरुलाई धन्यवाद दिए । तालिमका सहभागीहरुले साबुन बनाउने सीप आफूहरुका निम्ति ज्यादै लाभदायी हुने बताए । उनीहरुले आफूहरुजस्ता महिला उद्यमी बन्नका लागि यस्तै तालिम आगामी दिनमा पनि आवश्यक रहेको बताएका थिए । समापन सत्रमा वडा सदस्य कृष्णमाया थापामगर र प्रशिक्षक निर्मला बस्नेतले पनि आ–आफ्नो मन्तव्य राख्दै तालिममा हासिल गरिएका सीपलाई व्यवहारमा उतार्न प्रशिक्षार्थीलाई आह्वान गरे ।
मन्तब्यका क्रममा यस तालिममा लिएका सीपलाई ब्यवहारमा उतार्न, सिकेका सीपबाट आयआर्जन तथा ब्यवसायिक रुपमा गरी अर्थोपार्जन गर्न, सुरुवातमा खर्च कम गर्न दुई तीन जना मिलेर समुहमा गर्न वक्ताहरुले सुझाएका थिए । तालिममा सुनकोशी गाउँपालिका-३ कालिकाका ६० जना महिलाहरुको सहभागिता रहेको थियो । तालिमको प्रशिक्षकमा निर्मला बस्नेत र गीता खत्री रहेका थिए ।
