वैशाख १३,
काठमाडौं । नेपालबाट अमेरिकामा मानव तस्करी गर्दै आएका चलचित्र ‘हिम्मतवाली’ फिल्मका नायक एवं निर्माता सुदर्शन गौतमविरुद्ध रेडनोटिस जारी भएको छ । साढे ८ महिनाको प्रक्रियापछि गौतमविरुद्ध रेडनोटिस जारी भएको हो । रेडनोटिस जारी भएपछि इन्टरपोलका सदस्य रहेका १ सय ९२ देशका प्रहरीले गौतमको खोजी गर्नेछन् ।
क्यानाडामा बस्दै आएका गौतमले दुई वर्षअघि विभिन्न समयमा नेपाली युवा युवतिलाई चर्को रकम असुल्दै अमेरिका लैजाने भन्दै ठगी गर्ने गरेका थिए । फिल्म सुटिङ गर्ने बहानामा विभिन्न युवतिलाई अमेरिका लैजाने गरेका गौतम बिरुद्ध गत वर्ष तीन युवतिले प्रहरीमा उजुरी गरेका थिए । गौतमलाई ६० लाख बुझाएर अमेरिका हिँडेका युवति विचैमा पक्राउ परेपछि अमेरिकन दुतावासको सहयोगमा युवतिहरु नेपाल फर्किएका थिए ।
करेन्ट लागेर दुवै हात गुमाएका गौतमले रेखा थापा निर्देशित चलचित्र हिम्मतवालीमा लगानी गर्नुको साथै नायकको भुमिका निर्वाह गरेका थिए ।
