फागुन १७,
प्योङयाङ -उत्तर कोरियाका नेता किम जोङ अन र संयुक्तराज्य अमेरिकाका राष्ट्रपति डोनाल्ड ट्रम्पबीच दुबै मुलुकबीच आपसी चासोका विषयलाई सम्बोधन गर्न वार्ता र संवादलाई निरन्तरता दिन सहमति भएको उत्तर कोरियाली समाचार संस्था केसीएनएले जनाएको छ । “दुई नेताबीच दुई देशबीचको सम्बन्धलाई अगाडि बढाउन निकै रचनात्मक र खुलस्त रुपमा विचारहरु आदानप्रदान भए,” केसीएनएले प्रकाशन गरेको समाचारमा जनाइएको छ ।
हनोई शिखर बैठक आपसी सम्मान र विश्वास निर्माण गर्न निकै महत्वपूर्ण ठहरिएको बताउँदै केसीएनएले दुबै मुलुकबीचको सम्बन्ध नयाँ चरणमा प्रवेश गरेको जनाएको छ । सात दशकदेखिको तनाब तथा आउँदा दिनमा सामना गर्नुपर्ने कठिनाईलाई विचार गरी दुबै मुलुकका जनताको इच्छा बमोजिम दुबै देशले महत्वपूर्ण प्रगति गर्ने केसीएनले बताएको छ । राष्ट्रपति ट्रम्प र नेता किमबीचको दुई दिने हनोई वार्ताको दोस्रो दिन राष्ट्रपति ट्रम्पले बीचमै स्थगन गर्नुभएको थियो ।
राष्ट्रपति ट्रम्पले हनोईमा पत्रकार सम्मेलन गरी उत्तर कोरियाले आफ्नो मुलुकमाथि लागेका सबै प्रतिबन्धहरु फुकुवा गर्नुपर्ने शर्त राखेपछि वार्तामा कुनै प्रगति हुन नसकेको बताउनुभएको थियो । तर उत्तर कोरियाका विदेश मन्त्री री योङ हो ले शुक्रबार पत्रकार सम्मेलन गरी आफ्नो मुलुकमाथि लागेका प्रतिबन्धहरु आंशिक रुपमा फुकुवा गर्न बैठकमा आग्रह गरिएको स्पष्ट गर्नुभएको छ । मन्त्री होले प्रतिबन्धका कारण उत्तर कोरियाली जनताको जीवनस्तरमै असर पार्न लागेकाले त्यस्तो प्रतिबन्ध आंशिक रुपमा फुकाउन आग्रह गरिएको जानकारी दिनुभयो ।
वार्तालाई निरन्तरता दिन्छौं – राष्ट्रपति ट्रम्प
अमेरिकी राष्ट्रपति डोनाल्ड ट्रम्पले हनोई वार्ताका बारेमा दक्षिण कोरियाका राष्ट्रपति मून जाए–इन र जापानका प्रधानमन्त्री सिन्जो आबेलाई टेलिफोन गरी जानकारी दिनुभएको छ । ह्वाइट हाउसका अनुसार वासिङ्टन फर्कनेक्रममा राष्ट्रपति ट्रम्पले दुबै नेतालाई फोन गर्नुभएको थियो । ह्वाइट हाउसकी प्रवक्ता साराह स्यान्डर्सले राष्ट्रपति ट्रम्पले उत्तर कोरियाली नेता किमसँग वार्तालाई निरन्तरता दिने र गठबन्धनका मुलुकसँग पनि सहकार्यलाई निरन्तरता दिने जानकारी गराउनुभएको बताउनुभयो । अमेरिकी विदेशमन्त्री माइक पोम्पेओले दुई देशबीच अर्को वार्ता कहिले हुन्छ भन्नेमा मिति तय नभएको जानकारी दिँदै दुबै मुलुकबीच वार्तालाई घनिभूत गराउन आवश्यक रहेकामा जोड दिनुभयो ।
अब हाम्रो भूमिका अझ बढ्यो – राष्ट्रपति मून
दक्षिण कोरियाली समाचार संस्था योनहापका अनुसार राष्ट्रपति मून जाए–इनले “असफल देखिएको” उत्तर कोरिया र अमेरिकाबीचको वार्तालाई पुनः सही मार्गमा ल्याउन दक्षिण कोरियाले मध्यस्थता गर्ने बताउनुभएको छ । कोरियाको स्वतन्त्रता दिवसका अवसरमा मन्तव्य राख्दै राष्ट्रपति मूनले हनोई शिखर वार्ता असफल नभएको चर्चा गर्दै वार्तामा अर्थपूर्ण प्रगति भएको बताउनुभयो । उहाँले भन्नुभयो, “वार्तामा दुई मुलुकबीच सम्पर्क कार्यालय खोल्ने बारेमा छलफल भएको छ, र दुई देशबीचको सम्बन्धलाई सामान्य बनाउन यो निकै महत्वपूर्ण कदम हो । मैले राष्ट्रपति ट्रम्पलाई निकै विश्वास गरेको छु । उहाँले वार्तालाई निरन्तरता दिने प्रतिबद्धता व्यक्त गर्नुभएको छ र निकै सकारात्मक धारणा राख्नुभएको छ ।” “अब हाम्रो भूमिका अझ बढेर गएको छ । मेरो सरकारले संयुक्तराज्य अमेरिका र उत्तर कोरियासँग अझ नजिकको सञ्चार तथा सहयोगात्मक सम्बन्ध विस्तार गर्नेछ । कुनै पनि किसिमले दुई मुलुक सहमतिमा पुगुन् भन्ने मेरो धारणा छ ।”-रासस /सिन्ह्वा
