माघ ११, काठमाडौँ
संविधानले आमाको नाममा नागरिकता पाउने सुनिश्चित गरेको छ । तर संवैधानिक व्यवस्था कार्यान्वयनका लागि कानुन बनाउने क्रममा भने विवाद देखिएको छ । नेपाल नागरिकता ऐन २०६३ लाई संशोधन गर्न बनेको विधेयकमा आमाको नाममा नागरिकता दिने विषयलाई लिएर संसदीय समितिले अझै सहमति जुटाउन सकेको छैन ।
प्रतिनिधिसभाको राज्य व्यवस्था समितिको बिहीबारको बैठकमा आमाको नाममा नागरिकता दिने, नागरिकता ऐन संशोधन विधेयकको दफा २ पारित गर्ने कार्यसूचि थियो । तर पूर्वगृहमन्त्री एवं नेकपा सांसद जनार्दन शर्माले बैठकको सुरुमै छलफलको औचित्यमाथि नै प्रश्न उठाए। उनले नागरिकताका बिषयमा बहुमत वा अल्पमतभन्दा राष्ट्रिय सहमतिको आवश्यकतामा जोड दिए ।
त्यसपछि विधेयकमाथि संशोधन प्रस्ताव दर्ता गराएका सांसद हृयदेश त्रिपाठी संविधानमा आमाको नामबाट पनि नागरिकता पाउने व्यवस्था राख्ने दलहरु अहिले कानुन बनाउन हच्किएको भन्दै कड्किए ।
छलफलमा भाग लिएका अधिकांश सांसदले आमाको नामबाट नागरिकता लिने सन्तानको नागरिकतामा नै बाबुको पहिचान नभएको उल्लेख गर्दा त्यसले पीडितलाई थप पीडा हुने धारणा राखे । उनीहरुले बाबुको पहिचान नभएको उल्लेख नगरी नागरिकता दिन आवश्यक परे संविधान नै संशोधन गरिनुपर्ने बताए ।
तर सरकारी अधिकारीले भने पहिले पहिचान नखुलेका बाबु पछि विदेशी भएको खुलेमा समस्या आउने भएकाले नागरिकता वा सरकारी अभिलेखमा बाबुको पहिचान नखुलेको लेख्नुपर्ने आवश्यकता औंल्याए ।
समितिले यो विवादमा आवश्यक परे राजनीतिक दलको शिर्ष नेतृत्वसँग छलफल गर्ने बताएको छ । यसले नागरिकता विधेयक तत्काल टुंगोमा नपुग्ने देखिन्छ ।-कान्तिपुर
