काठमाडौं : सभामुख देवराज घिमिरेले बोलाएको बैठक सरको छ। सिंहदरबारमा बिहान साढे १० बजेका लागि बोलाइएको बैठक दिउँसो २ बजेका लागि सरेको सभामुखका प्रेस सल्लाहकार शेखर अधिकारीले जानकारी दिए। प्रधानमन्त्री पुष्पकमल दाहाल ‘प्रचण्ड’ भरतपुरमा रहेको र आउन ढिलो हुने भएपछि बैठक सरेको हो। सभामुख घिमिरेले प्रमुख चार दलका शीर्ष नेतालाई छलफलका लागि बोलाएका हुन्। छलफलका लागि प्रधानमन्त्री, प्रमुख प्रतिपक्ष दलका नेता शेरबहादुर देउवा, नेकपा एमालेका अध्यक्ष केपी शर्मा ओली र रास्वपाका सभापति रवि लामिछानेलाई बोलाइएको हो। सहकारी ठगी प्रकरणमा गृहमन्त्री रवि लामिछानेका सन्दर्भमा नेपाली कांग्रेसले संसदीय छानबिन समिति गठनको मागसहित सदन चल्न नदिने ‘अल्टिमेटम’ दिएकाले सभामुखले दलका शीर्ष नेतासँग छलफल गर्न लागेका हुन्। घिमिरेले आइतबार नै चारै नेतालाई टेलिफोन गरेर छलफलको समय निर्धारण गरेका हुन्। यसैगरी सभामुख घिमिरेले सोमबार नै दलका प्रमुख सचेतकसँग पनि छलफल गर्ने प्रेस सल्लाहकार अधिकारीले जनाएका छन्। प्रतिनिधिसभाको बैठक मंगलबारका लागि बोलाइएको छ।
