भक्तपुर । शुक्रबार साँझ भक्तपुरमा भएको सवारी दुर्घटनामा परि एक महिलाको मृत्यु भएको छ । काभ्रे जिल्लाको बनेपा नगरपालिका वडा नं. २, घिमिरेगाउँ घर भएका किरण घिमिरे र उनकी श्रीमती नबिना काफ्ले घिमिरे आफ्नो गाउँ पर्कर्दै थिए । उनका आफन्तका अनुसार किरण र नविना कामको शिलसिलामा काठमाडौमा बस्दै आएका थिए । शुक्रबार करिब ८ बजे भक्तपुर सूर्यविनायक नगरपालिका वडा नं. ८ आदर्श भक्तपुर फ्युल सेन्टर अगाडी भएको दुःखद घटनमा परि नविनाको मृत्यु भयो । श्रीमानसंग घरमा जान आएकी नबिना घरमा पुग्न पाइनन् ।
२५ वर्षको उमेरमा श्रीमान किरणलाई एक्लै छाडेर नविना सदाकोलागि यो संसारबाट बिदा भइन् । यो दुःख घिमिरे परिवारमा मात्रै परेन काभ्रे मण्डनदेउपुर-११ मा रहेको नबिनाको माइती काफ्ले परिवारले समेत आफ्नो छोरी सदाकोलागि गुमाउन पुग्यो । हजारौं सपना बोकेर शहर मेहनत गर्दै आएका किरणले आफ्नो जिवन साथी गुमाए ।
घटना यसरी भएको थियो । जिल्ला प्रहरी परिसर भक्तपुरका सूचना अधिकारी डीएसपी बसन्त पाठकका अनुसार हिजो राती करिब ८ बजे जगातीबाट सूर्यविनायक तर्फ जाँदै गरेको बाग्मती प्रदेश ०२–०२३ प २८५९ नम्बरको मोटरसाईकल र विपरित दिशा तर्फ आउदै गरेको प्रदेश नं ३ –०२–००२ प ६९३ नम्बरको मोटरसाईकल एक आपसमा ठक्कर खाए ।
त्यसपसिछ किरण घिमिरले चलाएको प्रदेश नं ३ –०२–००२ प ६९३ नम्बरको मोटरसाईकल अनियन्त्रित भई सूर्यविनायकबाट जागाती तर्फ आउदै गरेको बाग्मती प्रदेश ०३–००१ ख २४११ नम्बरको टेलर गाडीमा समेत ठक्कर खायो ।
श्रीमानले चलाएको प्रदेश नं ३ –०२–००२ प ६९३ नं.को मोटरसाईकल पछाडी बसेकी नबिना टेलर गाडीको चक्कामा परी किचिदा उनको घटनास्थलमा नै मृत्यु भयो । किरणको भने मध्यपुर ठिमी अस्पतालमा उपचार भईरहेको छ ।
सोही घटनामा बाग्मती प्रदेश ०२–०२३ प २८५९ नम्बरको मोटरसाईकल चालक जिल्ला ओखलढुंगा सुनकोशी गाँउपालिका वडा नं. ४ घर भई हाल भक्तपुर नलिन्चोक बस्ने बर्ष ३२ को हिरा बडालको पनि मध्यपुर ठिमी अस्पतालमा उपचार भईरहेको ।
दुर्घटना भएका ३ वटै सवारी साधन सहित टेलर चालक जिल्ला पर्सा विरगन्ज महानगरपालिका वडा नं. २ बस्ने बर्ष २५ को हासिब हुसेन अन्सारीलाई प्रहरी वृत्त जगाती भक्तपुरको नियन्त्रणमा राखी घटनाको सम्बन्धमा थप अनुसन्धान कार्य भईरहेको प्रहरीले जानकारी दिएको छ ।
