काठमाडौं : राष्ट्रियसभाका अध्यक्ष गणेशप्रसाद तिमिल्सिनाले जथाभावी रूपमा राष्ट्रिय गौरवको आयोजना भनेर नामकरण गर्न नहुने बताएका छन्। अध्यक्ष तिमिल्सिनाले राष्ट्रिय गौरवका आयोजनाको स्पष्ट परिभाषा तय गरी त्यसभित्र पर्नेलाई मात्रै त्यस्तो नाम दिन उपयुक्त हुनेतर्फ सरकारको गम्भीर ध्यानाकर्षण समेत गराए। मंगलबार संघीय संसद् राष्ट्रियसभाअन्तर्गतको राष्ट्रिय सरोकार तथा समन्वय समितिको सिंहदरबारमा बसेको बैठकमा बोल्दै उनले मन्त्री, प्रधानमन्त्रीलाई लाग्नेबित्तिकै राष्ट्रिय गौरवको आयोजना बनाउने काम गर्न नहुने पनि स्पष्ट पारे। कुनै पनि देशमा राष्ट्रिय गौरवका आयोजना हुनै नसक्ने उल्लेख गर्दै अध्यक्ष तिमिल्सिनाले ‘जति थोरै हुन्छ, त्यो गौरवको हुन्छ’ भन्ने मान्यताका साथ अघि बढ्न पनि सरकारलाई सुझाव दिए। राष्ट्रिय गौरवको आयोजनाको परिभाषालाई सरकारले थप व्याख्या गरेर अघि बढनुपर्ने उनको भनाइ थियो।
अध्यक्ष तिमिल्सिनाले भने, ‘राष्ट्रिय गौरवको परिभाषा हुनुपर्यो।। हाम्रो क्षमता, परिस्थिति, अवस्थाअनुसार निश्चित परिभाषाभित्र पर्ने हुनुपर्यो। कसैलाई लाग्नासाथ त्यो राष्ट्रिय गौरव बन्दैन। त्यसकारण राष्ट्रिय गौरवले परिभाषाले बन्ने हुनुपर्यो। त्यसकारण जति थोरै हुन्छ, त्यो गौरवको हुन्छ भन्ने हिसाबले जानुपर्छ।’अध्यक्ष तिमिल्सिनाले आयोजनाको काम पूरा नहुँदासम्म जिम्मेवार पदाधिकारीलाई अन्यत्र सरुवा नहुने व्यवस्था सरकारले गर्नुपर्ने बताए। त्यसो गरिए जवाफदेही सोही पदाधिकारी हुने भएकाले काम समयमै सम्पन्न गर्न सहज हुने उनको निष्कर्ष थियो।अध्यक्ष तिमिल्सिनाले विकास, निर्माणको काममा सकेसम्म स्वदेशी कच्चा पदार्थको उपयोगमा जोड दिनुपर्नेमा जोड दिए।
