काठमाडौं । वैशाख १२ गतेदेखि केदारनाथ धाम भक्तजनका लागि खुला गरिने भएको छ। उत्तराखण्ड राज्यको पर्यटन विभागका अनुसार तीर्थयात्रीको सुविधालाई दृष्टिगत गरी भारतीय रेलवे र पर्यटन निगमलाई अनलाइन बुकिङको अनुमति दिइएको छ। उत्तराखण्ड पर्यटन विकास परिषद्ले गत महिनाको प्रारम्भमै आगामी चारधाम तीर्थयात्राका लागि ६ लाख ३४ हजार भक्तजन दर्ता भइसकेका जनाएको छ। सरकारी अधिकारीले हिँडेर वा हेलिकप्टरबाट पनि केदारनाथ मन्दिरको यात्रा गर्न सकिने बताएका छन्।
परिषद्का अनुसार केदाननाथ यात्राका लागि २ लाख ४१ हजार र बद्रीनाथका निम्ति २ लाख १ हजार, यमुनोत्री जान ९५ हजार १०७ जना र गङ्गोत्रीको यात्राका निम्ति ९६ हजार ४४९ जनाले आवश्यक प्रक्रिया पूरा गरेका छन्। उत्तराखण्डका मुख्यमन्त्री पुष्करसिंह धामीले तीर्थयात्रीको स्वास्थ्यलाई उच्च प्राथमिकता दिँदै विभिन्न स्थानमा स्वास्थ्यकर्मीको टोली खटाइने बताएका छन्। यात्रा मार्गका ठाउँठाउँमा भक्तको स्वास्थ्य परीक्षण गरिने उनले बताए।
यसैबीच रुद्रप्रयाग जिल्ला प्रशासनले चारधाम यात्रामा आउने श्रद्धालुको सुविधाका निम्ति विभिन्न शिविर स्थापनालगायत आवश्यक तयारी गरिरहेको छ। उत्तराखण्डको चारधाम यात्रा भारतको सबैभन्दा लोकप्रिय हिन्दू तीर्थयात्रा मानिन्छ ।
