काठमाडौँ । रुपन्देहीमा सीमा क्षेत्रमा उच्च सतर्कता अपनाएसँगै भारतबाट अवैध रुपमा नेपाल भित्र्याइएका खसीबोका सशस्त्र प्रहरीले बरामद गरेको छ । भन्सार छलेर नेपाल आयात गरिएका खसीबोका सशस्त्र प्रहरी बल नेपाल, बीओपी बयरघाटले नियन्त्रणमा लिएर भन्सार पठाएको हो । अवैध रुपमा मासुजन्य वस्तुको आयातमा थप कडाइ गर्न गृह मन्त्रालयले निर्देशन दिएसँगै सीमा क्षेत्रमा सशस्त्र प्रहरी सक्रिय भएको हो ।
भारतबाट भित्रिएका मासुजन्य पशुका कारण स्वदेशी व्यवसायी मर्कामा परेको भन्दै गृह मन्त्रालयले अवैध रुपमा नेपाल भित्रिने त्यस्ता वस्तुकोे आयात रोक्न सरोकारवाला निकायलाई निर्देशन गरेको थियो ।
भन्सार छलेर नेपाल भित्र्याउँदै गरेको अवस्थामा लुम्बिनी सांस्कृतिक नगरपािलका १२ कालिदह आज्मा क्षेत्रबाट सशस्त्र प्रहरी निरिक्षक तेजराज शर्माको कमाण्डले ७ वटा खसीबोका बरामद गरेको हो । व्यवसायिक प्रयोजनका लागि अवैध रुपमा खुला सीमा नाका हुँदै लुकाई छिपाई ल्याउदै गरेको अवस्थामा करिब २ लाख रूपैयाँ बराबरको खसीबोका बरामद गरी भन्सार पठाइएको सशस्त्र प्रहरी निरिक्षक शर्माले जानकारी दिए ।
