भक्तपुर । लामो समयदेखि भक्तपुर नगरकोट सडक ठेकेदारले सडक नबनाएको विरोधमा चाँगुनारायण नगरपालिका वडा न. ७ का वडाअध्यक्ष श्यामकृष्ण नयाँजु (श्रेष्ठ)ले सडकमै पनि कार्यालयको काम गरेका छन् । मंगलबार बिहान कार्यालय समयदेखि सोही वडाको खरिपाटीस्थित सडकमा बसेको सेवाग्राहीको काम गरिरहेको छन् । टेबुल कुर्सी सहित सडकमा बसेर उनी सेवाग्राहीका काम गरिहेका देखिन्छन् । भक्तपुर नगरकोट सडक तत्काल निर्माण गर भन्ने ब्यानर नै टाँसेर वडा श्रेष्ठले सांकेतिक विरोध गर्दै वडाको काम गरेका हुन् ।
नयाँ नेपाल न्यूजसंग कुरागर्दै अध्यक्ष श्रेष्ठले भने ‘धेरै समय भयो सडक बनेन् ठेकेदार र सरकारको ध्यानाकर्षण गर्न मैले सडकबाट नै जनताको काम गर्दै छु ।’ करिब ८ वर्ष भन्दा लामो समय भइसक्दापनि नेकपा माओवादीका अध्यक्ष प्रचण्डका घरभेटि ठेकेदार शारदा प्रसाद अधिकारी मालिक रहेको शैलुङ्ग कन्ट्रसनले १७ किलोमिटर लामो भक्तपुर नगरकोट सडक निर्माण कार्य पुरा गर्न सकिरहेको छैन् ।
ठेकेदारले सडक नबनाएको विरोधमा चाँगुनारायण नगरपालिका वडा न. ६ नगरकोटका वडाअध्यक्ष धन बहादुर लामाले सोमबारदेखि नै सडकमै कार्यालयको काम गरिरहेका छन् ।
