काठमाडौं । सप्तरीको छिन्नमस्ता गाउँपालिकामा २५ वर्षका विद्यानन्द चौधरी अध्यक्षमा निर्वाचित भएका छन्। लोकतान्त्रिक समाजवादी पार्टीबाट उम्मेदवार बनेका चौधरीले प्रतिस्पर्धी जनता समाजवादी पार्टीका सत्यनारायण यादवलाई हराएर जित हात पारेका हुन्। चौधरीले २८९५ मत पाए भने जसपाका यादवले १७६६ मत ल्याए।
जितपछि चौधरीले आफूलाई मत दिएर छिन्नमस्ताका जनताले भरोसा गरेको बताए। ‘मभन्दा धेरै उमेरका नेताहरू चुनावी मैदानमा हुनुहुन्थ्यो तर छिन्नमस्तावासीले मलाई अत्याधिक मत दिएर जिताउनु भएको छ,’ चौधरीले भने,‘उहाँहरूको विश्वासलाई कायम राख्न सधैँ काम गर्नेछु।’ सामान्य परिवारका चौधरीले राजनीति शास्त्रमा स्नातक गरेका छन् भने अहिले एलएलबी पनि पढिरहेका छन्। सानैदेखि सामाजिक कार्यमा लाग्ने स्वभावका कारण राजनीतिमा लागेको उनले बताए।
‘मेरो बुवा गाउँघरमा कसैले गाह्रोसाह्रो पर्दा सहयोग गर्नुहुन्थ्यो। मलाई पनि सानैदेखि सामाजिक काममा रूची थियो,’ चौधरीले भने,‘त्यही क्रममा ८(१० वर्षअघि राष्ट्रिय मधेस समाजवादी पार्टीमा आवद्ध भएको हुँ।’ सप्तरीका लोसपा नेता केशव झाको मार्गदर्शनअनुसार आफू राजनीतिमा अघि बढेको उनले बताए।
यसपालि उनलाई टिकट पाउन भने निकै मेहनत गर्नुपरेको थियो। छिन्नमस्ताकै नेता प्रभाकर यादव जिल्ला समन्वय समितिका सभापति थिए। उनले पनि अध्यक्षमा दाबी गरेका थिए। पार्टीले चौधरीलाई टिकट दिएपछि उनले लोसपा छोडेर जनता प्रगतिशील पार्टीबाट उम्मेदवारी दिएका थिए। -सेतोपाटी
