माघ ११, काठमाडौं
काठमाडौंको कोटेश्वर महादेवस्थानबाट अपहरणमा परेकी २ वर्षीया बालिकालाई प्रहरीले ८ घण्टापछि सकुशल उद्दार गरेको छ । अपहरणकारी भने फरार रहेका छन् ।
जनकपुर स्थायी घर भएकी डा. बबिता साहकी २ बर्षकी छोरी सन्दिज्ञा साह शुक्रबार बिहान ८ बजे अपहरणमा परेकी हुन् । घटनालगत्तै परिवारले प्रहरीलाई खबर गरेपछि महानगरीय प्रहरी परिसर काठमाडौंका डिएसपी होविन्द्र बोगटीसहितको टोली खोजी कार्यमा खटिएको थियो ।
अपहरणकारीले बालिकालाई कोटेश्वर हुँदै जोरपाटी र जोरपाटीबाट बौद्धको जाम्बो डाँडा पुर्याएको पत्ता पाएपछि सोही अनुसार प्रहरी टोली उक्त ठाउँमा परिचालन भयो ।
‘अपहरणकारीले बालिकालाई अघिअघि र प्रहरी पछिपछि हुँदै अन्त्यमा अपहरणकारीले तिलगंगास्थित गणेश होटल अगाडि पुर्याए । त्यसपछि अपहरणकारीले बालिकालाई सडकमै छाडेर भागे’ काठमाडौं प्रहरी परिसरका प्रवक्ता समेत रहेका बोगटीले भने, ‘झण्डै आठ घण्टापछि बालिकालाई सकुशल उद्दार गरेका छौं । अपहरणकारीको खोजीकार्य जारी छ ।’
प्रहरीले अपहरणकारी जनकपुरकै मनिषकुमार गुप्ता रहेको जनाएको छ । गुप्ताले बालिकालाई किन अपहरण गरे भन्ने अनुसन्धान भइरहेको प्रहरीले बताएको छ ।
